ශූරයන්ගෙන් ශූරයා පාපන්දු තරගාවලියේ අවසන් මහ තරගය සඳහා රත්නම් කී‍්‍රඩා සමාජය හා නාවික හමුදා කී‍්‍රඩා සමාජය සුදුසුකම් ලබා සිටියි. එම අවසන් මහ තරගය ලබන සෙනසුරාදා (17) පස්වරු 3.30ට මැලේ වීදිය සිටි ලීග් පිටියේදී පැවැත්වේ. පෙරේදා (10) සිටි ලීග් පිටියේදී පැවති ශූරයන්ගෙත් ශූරයා දෙවැනි අවසන් පූර්ව තරගයෙන් රත්නම් පිල ගෝල 2-0කට මීගමුව දොන් බොස්කෝ පිල පරාජය කරමින් අවසන් තරගයට සුදුසුකම් සපිරීය. ඒ අනුව අන්තර් සමාජ ප‍්‍රධානතම පාපන්දු ලීග් තරගාවලියද ජය ගත් රත්නම් පිලට දැන් ශූරයන්ගෙත් ශූරයා කුසලාන දිනාගැනීමේ අවස්ථාවද හිමිව තිබේ. පෙරේදා තරගයේ අවසන් විනාඩි 10 ඇතුළතදී ගෝල දෙකක්ම වාර්තා කරමින්  රත්නම් පිල අවසන් මහ තරගයට ප‍්‍රවේශවීම කැපී  පෙනේ. එම ගෝල 82 වැනි විනාඩියේදී ඊ.බී. චන්න හා  87 වැනි විනාඩියේදී එම්. රවීන්ද්‍රන් විසින් වාර්තා කරන ලදී. එහිදී කි‍්‍රෂාන්ත අබේසේකර විසින් යාර 25කට වැඩි සීමාවක සිට ලබාදුන් පන්දු පහර ඊ.බී. චන්න විසින් කෙළින්ම දැල තුළට යොමු කරමින් ලබගත් පළමු ගෝලය බොහෝ දෙනකුගේ අවධානයට යොමුවූහ. රත්නම් පිල වෙතින් පරාජයට පත්වූ මීගමුව දොන් බොස්කෝ පිල ගිය වර ප‍්‍රධානතම ලීග් තරගාවලියේ ශූරතාව දිනා ගත් කණ්ඩායමයි. එහෙත් මෙවර ලීග් තරගාවලියේ ඔවුන් ලැබුවේ සිව්වැනි ස්ථානයයි. පැවැති  ශූරයන්ගෙත් ශූරයා පළමු අවසන් පූර්ණ තරගයේ ජය වාර්තා  කළේ නාවිකා හමුදා පිල විසිනි. ඒ යුද හමුදාව පරාජයට පත් කරමිනි. නාවිකයන් ශූරයන්ගෙත් ශූරයා තරගාවලියේ අවසන් මහ තරගයට තේරුණේ පළමු වතාවටය. එහිදී තවත් විශේෂත්වයක් වන්නේ වසර ගණනාවක් ප‍්‍රධානතම ලීග් තරගාවලිය හැර ගොස් සිටි නාවික  හමුදාව  නැවත තරගාවලියට එක්වූ පළමු අවස්ථාවේදීම සුවිශේෂි දස්කම් දැක්වීමය. ඔවුන් ලීග් තරගාවලියේ තෙවැනි තැනට පත්වුවත් ශූරයන්ගෙත් ශූරයා අවසන් පූර්ව තරගයේදී ඔවුන්ට පරජය වූ යුද හමුදාව ලීග් තරගාවලියේ දෙවැනි ස්ථානයට පත්ව සිටි කණ්ඩායමයි. ප‍්‍රධානතම ලීග් තරගාවලියේ සිව්වැනි ස්ථානය තෙක් පැමිණි කී‍්‍රඩා සමාජ හතර අතර ශූරයන්ගෙන් ශූරයා තරගාවලිය පැවැත්වේ. රත්නම් කී‍්‍රඩා සමාජය වසර 2010 ප‍්‍රධානතම තරගාවලියේ තෙවැනි ස්ථානයට පත්ව සිටියත් යුද හමුදාව එවරත් එහි දෙවැනි ස්ථානයේ රැඳී සිටීමට සමත් විය. මෙවර ලීග් තරගාවලිය රත්නම් කී‍්‍රඩා සමාජය ජය ගත්තේ තරග 22 කින් 15ක්ම ජය ගනිමිනි.