අධිසුඛෝපභෝගී වාහන සඳහා අවම දඩය රුපියල් දස දහසක් කරන්නැයි සමස්ත ලංකා යතුරුපැදිකරුවන්ගේ සංගමය ජනාධිපතිවරයාගෙන් ඉල්ලා සිටී.

රථ වාහන සඳහා අවම දඩය රුපියල් 2500 කිරීමෙන් දැඩි ලෙස පීඩාවට පත්වන්නේ අඩු ආදායම්ලාභීන්ගේ යතුරු පැදිය යැයි පවසන එම සංගමයේ ලේකම් චිරන්ත අමරසිංහ මහතා එමනිසා නීතිය ප්‍රායෝගික කිරීම සඳහා ජනාධිපතිවරයාගෙන් මෙම ඉල්ලීම කරන්නේ යැයි අවධාරණය කරයි.

යතුරුපැදිකරුවෙකු මසකට ඉන්ධන සඳහා දරණ වියදමට වඩා අදාළ දඩ මුදල වැඩි බවත්  මීට විරෝධය පළ කරමින් යතුරුපැදිකරුවන්ට තම අතෙහි හෝ යතුරුපැදියෙහි කළු පටියක් ප්‍රදර්ශනය කරන ලෙස  එම සංගමය ඉල්ලයි.

අවම දඩ මුදල වැරැද්ද කරන රියැදුරා ධාවනය කරන වාහනයේ වටිනාකම අනුව අයකිරීමට පියවර ගන්නැයි ද ඒ අනුව 100 සී.සී අඩු යතුරු පැදි සඳහා 30% කින් ද 100 සී.සී වැඩි යතුරු පැදි සඳහා 50% කින් ද අධිසුඛෝපභෝගී වාහන සඳහා 400% කින් ද දඩ මුදල් වැඩි කරන්නැයි ජනාධිපතිවරයාට ලිපියක් යොමු කරමින් එම සංගමය වැඩිදුරටත් ඉල්ලා සිටී.

දඩ මුදල් ඉහල නැංවීමට විරෝධය පළ කරමින් හෙට (15) ලංකා පෞද්ගලික බස් හිමියන්ගේ සංගමයද  වර්ජනයක් ක්‍රියාත්මක කිරීමට නියමිතය.

කෙසේ වෙතත්, මාර්ග ආරක්ෂාව තහවුරු කිරීම රජයේ වගකීමක් වන බැවින් මෙවර අයවැය මගින් යෝජිත මාර්ග නීති උල්ලංඝනය කිරීම සඳහා අවම දඩය වෙනස් නොකරන බව මුදල් අමාත්‍ය රවී කරුණානායක පවසයි..

මාර්ග නීති පිළි නොපැදීම අද රටේ පවතින විශාල ගැටළුවක් බවත් අයවැයට ඉදිරිපත් වූ යෝජනාවකට අනුව මෙය සිදුකළ බවත් ඔහු කීය.පෞද්ගලික බස් රථ හිමියන් නීතියට එරෙහිවීම පිළිගත නොහැකි කරුණක් යැයි අමාත්‍යවරයා කීවේය.