සම්පූර්ණයෙන් මුහුණු ආවරණය වන (ෆුල්ෆේස්) හෙල්මට් භාවිතය යතුරුපැදිකරුවන්ට සම්පූර්ණයෙන් තහනම් කිරීමට පොලිසිය ගත් තීරණය ක්‍රියාත්මකවීම අත්හිටුවමින් නිකුත් කළ අතුරු තහනම් නියෝගය ලබන පෙබරවාරි 21 වැනිදා තෙක් බලපැවැත්වෙන පරිදි දීර්ඝ කිරීමට  අද  (16) අභියාචනාධිකරණය තීන්දු කළේය.

 ෆුල්ෆේස් හෙල්මට් තහනමට එරෙහිව ගොනු කළ රිට් පෙත්සම් තුනක්    කැඳවු අවස්ථාවේදී අභියාචනාධිකරණය මෙම නියෝගය කළේය.

අභියාචනාධිකරණ සභාපති විජිත් මළල්ගොඩ සහ  විනිසුරු එස්. තුරෙයිරාජා මහත්වරුන් හමුවේ පෙත්සම කැඳැවිණි.

කොළඹ හිටපු නාගරික හදිසි මරණ පරීක්ෂක එඩ්වඩ් අහංගම, වරලත් ගණකාධිකාරී චානක දසනායක, විශ්‍රාමික මේජර් මනෝජ් නාලක මෙම පෙත්සම ගොනු කර ඇත.

නීතිපතිවරයා වෙනුවෙන් නියෝජ්‍ය සොලිසිටර් ජනරාල් ජනක් ද සිල්වා  මහතා පෙනී සිටි අතර පෙත්සම්කරුවන් වෙනුවෙන් නීතිඥ තිෂ්‍ය වේරගොඩ,පුලස්ති රූපසිංහ , ඉරේෂ් සෙනෙවිරත්න, නිලුකා දිසානායක සහ එඩ්වඩ් අහංගම යන මහත්ම මහත්මීහු පෙනී සිටියහ.