අන්තර්ජාතික මූල්‍ය අරමුදලෙන් ඉල්ලා සිටි ණය මුදල ඉදිරි සති දෙකක කාලය ඇතුළත ලැබෙතියි ශ්‍රීලංකාව අපේක්ෂා කරයි.
රට මුහුණදී සිටින ආර්ථික අර්බුදයට පිළියමක් වශයෙන් ලබාගැනෙන මෙම ණය මුදලේ වටිනාකම ඩොලර් කෝටි 100 - 200 අතර අගයක් වනු ඇති බව සඳහන්ය.
පසුගිය දින කිහිපයක පුරාම මෙම ණය මුදල ලබාගැනීම සඳහා කොළඹදී සාකච්ඡා පැවැත්වුණු අතර දැන් ඇමරිකාවේ වොෂින්ටන් නුවරදී අවසන් අදියරේ සාකච්ඡා පැවැත්වෙමින් ඇත.මෙම සාකච්ඡා වලට මුදල් අමාත්‍ය රවී කරුණානායක සහ මහබැංකු අධිපති අර්ජුන් මහේන්ද්‍රන් යන මහත්වරුන්ද එක්ව සිටිති.
මෙම සාකච්ඡා පැවැත්වෙන්නේ ණය මුදල ලබාදීම සම්බන්ධයෙන් අවසන් තීරණයකට එළැඹීමට බව භාණ්ඩාගාර ලේකම් ආර්.එච්.එස්. සමරතුංග මහතා පැවසීය.මුදල් ලබාදීමට ප්‍රථමයෙන් රටේ ආර්ථික පද්දතිය තවදුරටත් ශක්තිමත් කළ යුතුව ඇති බවද,ආයෝජන සිදුකිරීම පහසුවන ලෙස දැනට තිබෙන බාධක ඉවත්කළ යුතුව තිබෙන බවද, අන්තර්ජාතික මූල්‍ය අරමුදලේ අදහස යැයි ඒ මහතා වැඩිදුරටත් කීය.
