(සුජිත් හේවාජුලිගේ සහ අංජුල මහික වීරරත්න)
ඖෂධ ලියාපදිංචියට ජාතික ඖෂධ නියාමන අධිකාරියට භාරදී තිබූ ලිපිගොනු 2100 ක් එහි ගොඩ ගැසී තිබී සොයාගත් බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පාර්ලිමේන්තුවේදී අද (7) පැවසීය.
රජය බලයට පත්වීමෙන් පසු එම ලිපිගොනු නවසීයක් දක්වා අඩු කරගත් බවද හෙතෙම ප්‍රකාශ කළේය.
ඔහු මෙසේ පැවසුවේ මන්ත්‍රීනි නීතිඥ ලක්මාලි හේමචන්ද්‍ර මහත්මිය මතු කළ ප්‍රශ්නයකට පිළිතුරු දෙමිනි.
ඖෂධ ලියාපදිංචි කිරීමේ ක්‍රියාවලිය විධිමත් කරන බව පැවසූ අමාත්‍යවරයා ඖෂධ ලියාපදිංචි කිරීම වේගවත් කරන බවද සඳහන් කළේය.
නිසි පරික්ෂාව ඇතුව ඖෂධ ලියාපදිංචිය වේගවත් කරන බවද අමාත්‍යවරයා කීය.
ලියාපදිංචි නොකරන ලද සමාගම් කළ වංචා ගණනාවක් පිළිබඳව තොරතුරු අනාවරණය වී ඇති බවත්
ඒ ගැන පරීක්ෂණ කරගෙන යන බවත් ඔහු සඳහන් කළේය.
ඊට පසු ඒ ගැන අපරාධ පරීක්ෂණ දෙපාර්තමේන්තුවට පැමිණිලි කිරීමට බලාපොරොත්තු වන බවද අමාත්‍යවරයා පැවසීය.
ඉදිරි වසර දෙක තුන ඇතුළත ප්‍රමිතියෙන් උසස් ඖෂධ පරික්ෂා කිරීමේ විද්‍යාගාරයක් ඉදිකිරීමට ක්‍රමවේදයක් සකස් කරගෙන යන බව පැවසූ නලින්ද ජයතිස්ස මහතා මේ සඳහා රජයේ මුදල් යොදවීමට බලාපොරොත්තු වන බවද ප්‍රකාශ කළේය.
