(අංජුල මහික වීරරත්න)
ජාතික තරුණ සේවා සභාවේ ඉකුත් වසර වල විගණන අංශයෙන් විගණන වාර්තා ඉදිරිපත් කර, නිර්දේශ යොමු කළ ද ඒවාට නීත්‍යානුකූල ක්‍රියාමාර්ග ගැනීමේ ප්‍රමාදයක් පැවති බව ජාතික තරුණ සේවා සභාවේ අභ්‍යන්තර විගණන අංශය සහ තරුණ කටයුතු නියෝජ්‍ය අමාත්‍ය එරංග ගුණසේකර අතර සාකච්ඡාවකදී අනාවරණය විය.
මහරගම තරුණ සේවා සභාවේ දී මෙම සාකච්ඡාව පැවැත්විණි.
තරුණ කටයුතු නියෝජ්‍ය අමාත්‍යවරයා මෙහි දී සඳහන් කළේ එම ප්‍රමාදයන් සිදු වීමේ හේතුව පිළිබඳව සොයාබලා එම කටයුතු කඩිනම් කිරීමට අවශ්‍ය පියවර ගන්නා ලෙසය.
යෞවන සමාජ සම්මේලනය සහ තරුණ සේවා සභාවේ විගණන වාර්තාව නිර්දේශ සමඟ කඩිනමින් ලබාදෙන ලෙස ද නියෝජ්‍ය අමාත්‍යවරයා විගණන අංශයට දැනුම් දුන්නේය. විගණන අංශයේ පවතින ගැටලු සහ දැනට සිදුවෙමින් පවතින ක්‍රියාවලිය පිළිබඳවත් මෙහි දී නියෝජ්‍ය අමාත්‍යවරයාගේ අවධානය යොමු විය.
නියෝජ්‍ය අමාත්‍යවරයා විගණන අංශය, තරුණ සේවා සමූපාකාරය, වෘත්තීය මාර්ගෝපදේශ අංශය, තරුණ සේවා සමාගම, යෞවන තිළිණ ප්‍රදාන අංශය, මාධ්‍ය අංශය, නිස්කෝ ආයතනය, තොරතුරු තාක්ෂණ අංශය, ව්‍යවසායකත්ව සංවර්ධන අංශය යන අංශ සමඟ සාකච්ඡා කළේය.
