ඇමෙරිකන් ජනාධිපතිවරණයෙන් යළිත් වරක් ජයග්‍රහණය කළ ඩොනල්ඩ් ට්‍රම්ප්ට රුසියන් ජනාධිපති ව්ලැදිමීර් පුටින් සුබ පතා ඇත. ‘ට්‍රම්ප් ධෛර්යවන්ත පුද්ගලයෙක්’ යැයි රුසියන් ජනාධිපතිවරයා පෙන්වා දී ඇත.
රුසියන් ජනාධිපතිවරයා ට්‍රම්ප් වර්ණනා කර ඇත්තේ රුසියාවේ සෝචි නුවර උත්සවයක් අතරතුරේය. ‘ට්‍රම්ප් ධවල මන්දිරයට ආ පළමු ධුර කාලයේදී හැමෝම ඔහුට වටකර ගනිමින් පහර දුන්නා. ඔහු සැලුණේ නැහැ. යළි ජනාධිපති වෙන්න ඔහු උත්සාහ ගනිද්දී ඔහුට කෙණෙහිලිකම් කළා ඒත් ඔහු සැලුණේ නැහැ. ඝාතනය කිරීමට උත්සහ ගත්තා. ඒත් ඔහු පරාජය බියට පත්වුණේ නැහැ’ යැයි පුටින් පවසා ඇත.
තමන් ජනාධිපති වුවහොත්, දිනක් ඇතුළත රුසියන් යුක්රේන යුද්ධයට පැහැදිලි විසඳුමක් ලබා දී, එය සමතයකට පත් කරන බවට ට්‍රම්ප් දිගින් දිගටම ප්‍රතිඥා දී ඇත. මේ ගැන අදහස් දක්වමින් පුටින් පවසා ඇත්තේ ට්‍රම්ප් යෝජනා කරන්නේ කුමක්දැයි අසා දැන ගැනීමට තමන් උනන්දුවෙන් පසුවන බවය.
(ඒ.එෆ්.පී.)
