(යොහාන් භාසුර)
වර්තමාන රජයට අධ්‍යාපනය ඉතා වැදගත් විෂයක් ලෙස සළකමින් විශේෂ අවධානයක් සහ ප්‍රමුඛතාවයක් දෙන බවත් පුනරුද යුගයක් වෙනුවෙන් පරිවර්තනයන් කිරීම ජාතික ජනබලවේග ආණ්ඩුවේ මූලික අරමුණ බවත් අග්‍රාමාත්‍ය ආචාර්ය හරිනි අමරසූරිය මෙනෙවිය පැවසුවාය.
පළාත් අධ්‍යාපන ප්‍රධානීන් සමග අරලියගහ මන්දිරයේදී පැවති හමුවකදී අග්‍රාමාත්‍යවරිය එසේ කියා සිටියාය.
පරිවර්ථනයක් සඳහා අවශ්‍ය මානව සම්පත නිර්මාණය වන ප්‍රධානම තැන අධ්‍යාපනය බවත් ඒ නිසා අධ්‍යාපන ක්ෂේත්‍රයේ විශාල පරිවර්තනයක් කිරීමට බලාපොරොත්තු වන බවත් ඇය පැවසුවාය.
අධ්‍යාපනය වැනි සංවේදී මාතෘකාවක එවැනි පරිවර්තනයක් වෙද්දී අනිවාර්යයෙන්ම එකඟතාවයෙන් සහ අවබෝධයෙන් යුතුව කටයුතු නොකළ හොත් අර්බූදයක් වීමට ඉඩ ඇති බවත් පොදු විභාග ක්‍රමය යටතේ විභාගයට මුහුණ දෙන රටේ සමස්ත දරුවන්ට පොදු අධ්‍යාපන ක්‍රමයක් තිබිය යුතු බවත් ඇය සඳහන් කළාය.
පළාතෙන් පළාතට වෙනස් අවශ්‍යතා තිබිය හැකිවුවද ප්‍රතිපත්ති අතර ලොකු පරස්පරයක් තිබිය නොහැකි නිසා ප්‍රතිපත්ති මට්ටමේ තීන්දු තීරණ ගද්දී ජාතික මට්ටමේ ප්‍රතිපත්තියට අනුකූලව වැඩ කිරීමට සිදුවන බවත් පහේ ශිෂ්‍යත්වය අහෝසි කරන ලෙස ජනතාවගේ ඉල්ලීමක් ඇති බවත් අග්‍රාමාත්‍යවරිය පැවසුවාය.
එමගින් දරුවන්ට පීඩනයක් ඇති කරනවා යැයි පවසුණ ද එවැනි තීරණයක් ගැනීමට පෙර පහේ ශිෂ්‍යත්වය ආරම්භ කිරීමට හේතුවට අවදානය යොමුකළ යුතු බවත් පාසල් අතර පරතරය එයට හේතුවක් බවට පත්ව තිබෙන බව කී අග්‍රාමාත්‍යවරිය පැවසුවේ පහේ ශිෂ්‍යත්වය අහෝසි කිරීමට නම් පාසල් අතර පරතරය නැති කළ යුතු බවත්ය.
මෙම අවස්ථාවට අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න, අග්‍රාමාත්‍ය ලේකම් ප්‍රදීප් සපුතන්ත්‍රී, අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යංශ ලේකම් නාලක කලුවැව යන මහත්වරු, පළාත් ප්‍රධාන ලේකම්වරු, පළාත් අධ්‍යාපන ලේකම්වරු සහ පළාත් අධ්‍යාපන අධ්‍යක්ෂකවරු ඇතුළු නිලධාරීන් පිරිසක් සහභාගී වී සිටියහ.
