(ගයාන් සූරියආරච්චි)

නාවික හමුදාපති වයිස් අද්මිරාල් ප්‍රියන්ත පෙරේරා මහතා ජනාධිපති අනුර කුමාර දිසානායක මහතා විසින් අද (30) දින සිට අද්මිරාල් ධූරයට පත්කර ඇත.

ප්‍රියන්ත පෙරේරා මහතා ශ්‍රී ලංකා නාවික හමුදාවේ 25 වැනි නාවික හමුදාපතිවරයා ලෙස ඉකුත් 2022 වසරේ පත්කරනු ලැබීය.

කොළඹ රාජකීය විද්‍යාලයේ ආදි ශිෂ්‍යයෙකු වූ ඔහු 1987 වර්ෂයේ ජෙනරාල් ශ්‍රීමත් ජෝන් කොතලාවල ආරක්‍ෂක විශ්ව විද්‍යාලයේ 5 වන බඳවා ගැනීමට අයත් ශිෂ්‍යභට නිලධාරියෙකු වශයෙන් ශ්‍රී ලංකා නාවික හමුදාවේ විධායක අංශයට එක්වීය.

පසුව කොතලාවල ආරක්‍ෂක විශ්ව විද්‍යාලයෙන් සහ නාවික හා සාගරික විද්‍යාපීඨයෙන් මූලික පුහුණුව සාර්ථක ලෙස අවසන් කල ඔහු, එම බඳවාගැනීමේ දක්‍ෂතම මධ්‍ය නිලධාරියාට හිමි සම්මානනීය අසිපත හිමිකරගැනීමට සමත්විය. අනතුරුව, උප ලුතිනන්වරයෙකු වශයෙන් 1989 වර්ෂයේදී අධිකාරියට පත් වන ඔහු, කොතලාවල ආරක්ෂක විශ්ව විද්‍යාලයෙන් ශාස්ත්‍රවේදී (ආරක්ෂක අධ්‍යයන) ගෞරව උපාධිය ලබාගත්තේය.