‘ජනපතිවරයකු ලෙස පත්වූ පුද්ගලයකුට දෙවරකට වඩා තරඟ කළ නොහැකි යැයි වගන්තියක් 19 වැනි ආණ්ඩු ක්‍රම ව්‍යවස්ථා සංශෝධනයට ඇතුළු කර තිබෙනවා.  මං ඊළඟ පාරත් ඉල්ලනු ඇතැයි සිතා තමයි ඒ වගන්තිය ඇතුළු කර තියෙන්නේ. බයවෙන්න එපා ඊළඟ පාර මං ඉල්ලන්නේ නෑ‘ යැයි හිටපු ජනපති මහින්ද රාජපක්ෂ මහතා දැදිගම දී පැවසීය.

දෙවරක් ජනපති ධුරය දැරූ පුද්ගලයකු යළිත් තෙවැනි වර එම පදවියට තරඟ කිරීම වළක්වමින් ජේ ආර් ජයවර්ධන හිටපු ජනපති 1978 ව්‍යවස්ථාවට ඇතුළු කළ වගන්තිය ඉවත් කරමින් හිටපු ජනපති මහින්ද රාජපක්ෂ 18 වැනි සංශෝධනය ලෙස 2010 දී පාර්ලිමේන්තුවට ඉදිරිපත් කර සම්මත කර ගත්තේ හදිසි පනතක් ලෙසිනි.

ඉන් පසු සිය ධුර කාලය වසර දෙකක් තිබිය දී ජනපතිවරණයක් පැවැත්වූ මහින්ද රාජපක්ෂ මහතා ඉන් පරාජය විය.