(විමුක්ති එස් රුද්‍රිගු)

ඇමෙරිකාවේ බැල්ටිමෝර් ප්‍රදේශයේ ෆ්‍රැන්සිස් ස්කොට් කී පාලමේ ගැටුණු ශ්‍රී ලංකාව බලා යාත්‍රා කරමින් සිටි ඩාලි නම් දැවැන්ත භාණ්ඩ ප්‍රවාහන නෞකාව හසුරුවා ඇත්තේ බැල්ටිමෝර් වරායේ සිට නෞකාවක් යාත්‍රා කරවන විට හමුවන බාධක මගහරවා ගනිමින් නෞකා යාත්‍රා කරවීමට විශේෂ පුහුණුවක් ලැබූ ඇමෙරිකානු නාවිකයන් පිරිසක් බව මේරිලන්ඩ් ප්‍රවාහන ලේකම් පොල් වීඩ්ෆෙල්ඩ් මාධ්‍ය හමුවකදී ප්‍රකාශ කළේය.

බැල්ටිමෝර් වරායේ සිට විවෘත මුහුද තෙක් නෞකාව යාත්‍රා කරවීම විශේෂ පුහුණුවක් ලැබූ නාවිකයන්ට බාර වී ඇතත් ඩාලි නෞකාව වරායෙන් පිටවූ වහාම එහි ප්‍රචාලක අක්‍රිය වී ඇතැයි මූලික විමර්ශනවලින් අනාවරණය වූ බව පොල් වීඩ්ෆෙල්ඩ් පැවැසුවේය.ප්‍රචාලක අක්‍රිය වූ වහාම නැව පාලනයෙන් ගිලිහුනු බවත් ෆ්‍රැන්සිස් ස්කොට් කී පාලමේ නෞකාව පාලමේ ගැටීමේ හැකියාවක් තිබෙන බවත් එම නාවිකයන් මේරිලන්ඩ් ප්‍රවාහන දෙපාර්තමේන්තුවට දැනුම් දුන් බව පොල් වීඩ්ෆෙල්ඩ් මාධ්‍ය හමුවේදී ප්‍රකාශ කළේය.

ඩාලි කන්ටේනර් නෞකාව 2015 වසරේ සිට පරීක්‍ෂණ 27කට භාජනය කර ඇති අතර, එහි දෝෂ දෙකක් ඇති බව එම පරීක්ෂණවලදී අනාවරණය වී ඇතැයිද පොල් වීඩ්ෆෙල්ඩ් පැවැසුවේය.පසුගිය වසරේ සැප්තැම්බර් 9 වැනිදා නෞකාව ඇමෙරිකානු වෙරළ ආරක්ෂකයන් පරික්ෂා කිරීමේදී එම දෝෂ සොයා ගැනුණු බව පොල් වීඩ්ෆෙල්ඩ් ප්‍රකාශ කළේය.

පාලම කඩා වැටීම හේතුවෙන් පැටප්ස්කෝ ගංගාවට වැටී අතුරුදන් වී සිටින කම්කරුවන් සය දෙනා මියගොස් ඇතැයි විශ්වාස කරන බවත් පැටප්ස්කෝ ගංගාව හරහා වැටී තිබෙන නැවු මාර්ගයේ වෙළඳ කටයුතුවලට ඉන් බාධා එල්ල වනු ඇති බවත් වීඩ්ෆෙල්ඩ් පැවැසුවේය.