සම්මාන උළෙල දෙකකදී එකවර හොඳම සම්මානයට පාත‍්‍රවීම නළුවකු හෝ නිළියක ලබන විශාල භාග්‍යයකි. පසුගියදා පැවැති රයිගම් ටෙලි සම්මාන උළලේදී හොඳම නිළිය වූ හිමාලි සිරිවර්ධන මෑතකදී පැවැත්වූ සිග්නීස් සම්මාන උළලේදී ද හොඳම නිළිය සම්මානය ලබමින් ඒ භාග්‍යයට හිමිකම් කීවාය. එලෙසින් සිග්නීස් උළලේදීද ඇය සම්මාන ලැබුවේ සමන්කුමාර ලියනගේ ස්වර්ණවාහිනිය වෙනුවෙන් කළ සඳගිරිපව්ව ටෙලිනාට්‍යයේ රඟපෑම වෙනුවෙනි. සම්මාන ද්විත්වයකින් හොඳම නිළිය වූ හිමාලි කෞෂල්‍යා සිරිවර්ධන සමග අපි අද සැඳැල්ල කතාබහට එක්වෙමු. හිමාලි  හොඳම නිළිය සම්මාන දෙකක්ම ලැබීම ගැන හිතන්නෙ කොහොමද? එක අතකට ඒක විශේෂිත සිදුවීමක්. මම මුලින්ම රඟපෑවේ සමන් කුමාර ලියනගේ මහතා අධ්‍යක්‍ෂණය කළ සඳගලතැන්න නාටයයේ සඳා ලෙසයි. එහි රඟපැම වෙනුවෙන් සම්මාන කීපයක්ම ලැබුවා. ඉන්පසුව දෙවන වරට රඟපෑවේ සමන්කුමාර ලියනගේ අධ්‍යක්‍ෂණය කළ ස්වර්ණවාහිනියේ විකාශය වූ මේ ”සඳගල තැන්න” නාට්‍යයේ චරිතයයි. එහි මද්දුමී (කමලා) කියන චරිතයට තමයි මේ සම්මානය ලැබුනේ. මීට පෙර රයිගම් උළලේදීත් මේ චරිතයට තමයි හොඳම නිළිය වුණේ.   ඔබ කලා අංශයට එන්නේ නර්තන ශිල්පිණියක ලෙසයි. ඉන්පසුව නිළියක ලෙස දස්කම් පෙන්වන්න පටන් ගත්තා. මේ අංශ දෙක ඔබට දැනෙන්නේ කොහොමද? මුලින්ම ආවේ නර්තන ශිල්පිණියක ලෙස. ඉන්පසුව වෙළඳ දැන්වීම් වලට පෙනී හිටියා. පසුව රඟපාන්නත් ලැබුණා. මම හිතන්නේ ඒ සියල්ලට මුල මම නර්තන ශිල්පිණියක ලෙස කටයුතු කිරීම කියලයි.   නර්තන ශිල්පිණියක ලෙස ඔබ තරුණ පරපුර අතර වැඩි ආකර්ශනයක් ලබා ගැනීමට හේතු වූ විශේෂිත දේවල් මොනවාද? මම නර්තනය වෙතින් ක්‍ෂේත‍්‍රයට එන විට බටහිර සම්ප‍්‍රදායට හුරු නර්තන කණ්ඩායම් ප‍්‍රාසාංගික අංශයට එතරම් යොමුව තිබුණේ නැහැ. අපට ඒ හිඩැසට තැනක් ලැබුනු අතර අපි වෙනස් රිද්මයන් අනුගමනය කිරීමත් ඒ ආකර්ෂණයට ඉවහල් වුණා. ඒ වෙනස වගේම අපේ විලාසිතා පවා බලපාන්න ඇති. මොකද මම නිතරම බැලූවේ ලැබෙන මුදලට වඩා අපෙන් ලබා දෙන දායකත්වය ගැනයි. ඒ නිසා ඒ සියල්ල වෙනුවෙන් වැඩිපුර වියදම් කළා. ලාභ නොබලා වැඬේ හරියට කරන්නත් අදටත් අපි කැප වෙනවා. සාර්ථකත්වයට හේතු ඒවා වෙන්න ඇති.   සාර්ථකත්වය කෙසේ වෙතත්. ඔබගේ සෙන්සේෂන් නර්තන කණ්ඩායම ගැන ප‍්‍රවීනයින් අතර ලොකු විවේචන තියෙනවා නේද? විශේෂයෙන්ම සාම්ප‍්‍රදායික නර්තනයේ රිද්මය රකින අය ඔබට විවේචන එල්ල කරනවා නේද? බටහිර නර්තන ආරයට නැතිව අපි ක්ක්‍ෂේත‍්‍රයට ආපු නිසා තමයි මේ විවේචන. නමුත් මම විශ්වාස කරන්නේ අද අපට බැනපු අයට අද අප අනුගමනය කරන තරමට පත්වෙලා. විශේෂයෙන්ම අපේ නර්තනයේදී භාවිතා කළ විලාසිතා ආදිය අද ඒ අයම භාවිතා කරනවා. ඇත්තටම විවේචන අවශ්‍යයි. එයින් ගන්න යමක් තියෙනවා. ඒත් එදා ඒ විවේචන වලදී මම ගත යුතු දේ විතරයි ගත්තෙ. කොහොම වුණත් ආ දින සිට අපට රැඳී සිටීමේ ගුණය රැකුණේ අප තුල යමක් තිබූ නිසා වෙන්න ඇති. මොකද මේ ක්‍ෂේත‍්‍රයේ බොහෝ විට ආ සැණකින් නැතිව යනවා. අපට එහෙම වුණේ නැහැ. අපි අපට හිතෙන හරි දේ මිස වැරැදි දේ කළේ නැහැ. යම්කිසි පදනමක් ඉලක්කයක් ඇතිව ආවෙ. අපි හරි කියලා හිතනදේ සමහර අය වැරදි කියලා හිතන්න පුළුවනි.   සමහරු නර්තනය ලෙස දකින්නේ ඒ රටට උරුම සම්ප‍්‍රදාය රැකගත් පැතිකඩක් ලෙසයි. තවත් සමහරු හිතන්නේ භාවාත්මක ප‍්‍රකාශනයක් කියලයි. නමුත් ඔබ කණ්ඩායම ඇඳුම සහ වඩා නිරාවරණය වූ රටා නිසා ආකර්ශනයට නතු වූ කන්ඩායමක්ද? ඔබ කොහොමද එය දකින්නේ? නර්තනය ඔබ කොහොමද දකින්නෙ? ඔය කියන නර්තන ක‍්‍රම බොහෝමයක් අපි කරනවා. එහිදී තැනට සහ මාතෘකාවට අදාලව අපි විලාසිතා යොදා ගන්නවා. උදාහරණයකට අපි පිහිනුම් තටාකයට අඳින ඇඳුම දිහා බලමු. එය එතැනට මිස අනිත් තැන් වලට ගැලපෙන්නේ නැහැ. මෙන්න මේ ගැලපීම අපි නිවැරදිව කළා. උඩරට හෝ එය ආශ‍්‍රිත නර්තනයේදී ඊට ගැලපෙන දේ තෝරා ගත්තා. ඊට අමතරව මුළු සිරුරම ආවරණය වන පරිදි විලාසිතා ගලපා ගත්තා. අපි නිතරම එක තැන විකාශය වුණේ නැහැ. නැවුම් වෙනසක් ඒ මගින් ගෙනාවා.   ”නර්තනය” කියන දේ ඔබ විග‍්‍රහ කරන්නේ කොහොමද? කිසියම් රිද්මයානුකූල බවක් වෙතින් අපි ප‍්‍රකාශනයක් ඉදිරිපත් කරනවා. සමහර වෙලාවකට අපි ප‍්‍රාසාංගික - ප‍්‍රසංග වලදී ඔය කියන භාව ප‍්‍රකාශන ප‍්‍රකාශ කිරීම් කළ නොහැකියි. සිංදු වලට නැටුවත් අපි ඒ සිංදුවට ගැලපෙන තේමාවකට තමයි නිර්මාණය ඉදිරිපත් කරන්නෙ. සිංදුවට නටනවා කියන චෝදනාව ආවොත්, අද වන විට හැමෝම වාගේ නටන්නේ සිංදුවට තමයි. එහෙම නොකරන අය සිටින්නේ අල්පයක් විතරයි. කොහොම වුණත් එය කාටවත් හානියක් නොවන පරිදි කළොත්, එයයි වැදගත් වන්නේ. භාවාත්මක ප‍්‍රකාශනයට වඩා ප‍්‍රසාංගයකදී වැදගත් වන්නේ වින්දනීය ආස්වාදයයි. අපේ කණ්ඩායමේ දහ දෙනාට අමතරව මා යටතේ පුහුණුව ලබන අය කණ්ඩායමට බඳවා ගන්නවා.   නර්තය ගැන ඔබ එසේ කීවාට අද වැඩි දෙනා කතා වන්නේ ඔබගේ රංගනය ගැන නේද? ඔබට කොහොමද එය  හැෙඟන්නේ? වඩා දක්‍ෂ නර්තනයටද? රංගනයටද? ආරම්භය නර්තන ශිල්පිණියක් නිසා මගේ මුල එතැන. ඒ නිසා නර්තනයට වැඩි කැමැත්තක් තියෙනවා. ඒත් රංගනයටත් ඒ හා සමානවම කැමතියි. මේ දෙකම මම කරන්නේ කැපවීමෙන් සහ මහන්සියෙන්.   ඒ කැපවීම කරන්න ඔබට පුද්ගලිකව නිදහස ලැබෙනවාද? ඇත්තටම මගේ ගෙදර අය සහ මහත්තයාගෙන් ලැබුණු සහයෝගය නොතිබෙන්න මෙච්චර සාර්ථක වෙන්න ඉඩ ලැබෙන්නේ නැහැ. නිතරම තනියට මගේ අක්කා මා එක්ක හිටියා.   හිමාලි ඔබ කොහොම කෙනෙක්ද? තරමක් කාර්යබහුල කෙනෙක්. වෙලාවකට හරි සරලයි. ඒ වගේම සංවේදියි කියලත් හිතෙනවා. නර්තනයේදී අවශ්‍ය දේ මගේ කණ්ඩායම වෙතින් උපරිමයෙන් ලබා දීම අරමුණයි.

හිමාලි ගැන කෙටියෙන්

විලාසිතා - නිකොලා ඌරුලගමගේ

සටහන/ඡායාරූප  -  සඳුන් ගමගේ