මූල්‍ය අපරාධ විමර්ශන ඒකකයෙන් හා රජයේ වෙනත් ආයතනවලින් සිදුවෙතියි කියන අසාධාරණ ක්‍රියා ගැන ස්විට්සර්ලන්තයේ ජිනීවා නුවර අන්තර් පාර්ලිමේන්තු සංගමයට ඒකාබද්ධ විපක්ෂ මන්ත්‍රීවරු අද (31) සංදේශයක් බාර දුන්හ.

ඒකාබද්ධ විපක්ෂ සංවිධායක ඩලස් අලහප්පෙරුම, බන්දුල ගුණවර්ධන හා උදය ගම්මන්පිල මන්ත්‍රීවරු එම තිදෙනාය. බදාදා ස්විට්සර්ලන්තයට ගිය එම තිදෙනා අන්තර් පාර්ලිමේන්තු සංගමයේ මහ ලේකම් මාටින් චුන්ගොන් හමුවීම සඳහා පිටත්ව ගියේය.

ඔවුහු අද මහ ලේකම් හමුවී එෆ්සීඅයිඩිය ඇතුළු ආයතන පිළිබඳ මූලික කරුණු 7ක් සම්බන්ධයෙන් පැමිණිලි කළහ. ඔවුන් කියා සිටියේ අපරාධ විධි විධාන සංග්‍රහය හා පොලිස් ආඥා පනත උල්ලංඝනය කරමින් එෆ්සීඅයිඩිය පිහිටුවා ඇති බවයි.

එය ඉතා සියුම් ලෙස ක්‍රියාකරන දේශපාලන උපකරණයක් බවත් එය අගමැතිගේ අනුබලය යටතේ ඒකාබද්ධ විපක්ෂය මර්දනය කිරීමට යොදා ගන්නා බවත් ඔවුන්ගේ සංදේශයේ දැක්වේ.

‘‘එෆ්සීඅයිඩිය දැනට මන්ත්‍රීවරුන් 29 දෙනකුගෙන් ප්‍රශ්න කර ඇත. එෆ්සීඅයිඩියේ එක් අරමුණක් වනුයේ ඒකාබද්ධ විපක්ෂයේ මන්ත්‍රීන් ආණ්ඩුවට බඳවා ගැනීම සඳහා බිය වැද්දීමයි. පාර්ලිමේන්තු සංගමයට බාරදුන් ලිපියේ ඒකාබද්ධ විපක්ෂයේ මන්ත්‍රීවරු 9 දෙනකුගේ අත්සන් ඇත. ඒකාබද්ධ විපක්ෂ මන්ත්‍රීන්ගේ අයිතිවාසිකම් හා වරප්‍රසාද අහිමි කරතියි ද විපක්ෂ නායක හා විපක්ෂයේ ප්‍රධාන සංවිධායක පත් කිරීමේදී ඔවුන් නොසලකා හැර ඇත. පාර්ලිමේන්තුවේ ප්‍රමාණවත් නියෝජනයක් ලබාදෙන්නේ නැහැ. රජය වැදගත් ප්‍රශ්න වලදී මන්ත්‍රීන් හෑල්ලුවට පත් කරමින් උත්තර දෙනවා. කඩිනම් පිළිතුරු දීමට නියමිත ප්‍රශ්නවලට මාස ගණන් ගන්නවා. මෙම කරුණු කාරණා නිසා ශ්‍රී ලංකාවේ ප්‍රජාතන්ත්‍රවාදී අගයට හා සම්ප්‍රදායට හානි සිදුවනවා. අපගේ අදහස වනුයේ මන්ත්‍රීවරුන්ට පාර්ලිමේන්තු කාලය දීමේදී හා කමිටුවලට මන්ත්‍රීන් තෝරා ගැනීමේදී අදාළ දේශපාලන පක්ෂවල මන්ත්‍රී ප්‍රමාණය සැලකිල්ලට ගත යුතු බවයි. ඒ අනුව ක්‍රියා කළ යුතු බවයි.  මෙම නින්දා සහගත තත්ත්වය වහා නිවැරදි කරන ලෙස ශ්‍රී ලංකා බලධරයනට බලපෑම් කරන්නැයි අප ඉල්ලා සිටිනවා.‘‘

පිටු හතරකින් යුත් මෙම ලිපියට පාර්ලිමේන්තු මන්ත්‍රීවරුන් වන දිනේෂ් ගුණවර්ධන, ඩලස් අලහප්පෙරුම, සී.බී.රත්නායක, මහින්ද යාපා අබේවර්ධන, මහින්දානන්ද අලුත්ගමගේ, බන්දුල ගුණවර්ධන, පවිත්‍රා වන්නිආරච්චි, වීරකුමාර දිසානායක, උදය ගම්මන්පිල යන අය අත්සන් තබා ඇත.

gammnpila_2016331 gammnpila_20163312 gammnpila_201633123