නිරූපණ ක්ෂේත්‍රයට නවකයෙකු වන බියුමාලි ප්‍රසංසාගේ සිහිනය වන්නේ නිරූපණ ක්ෂේත්‍රයේ ජයග්‍රාහකයෙකු වීමටයි. ඇය ඒ පිළිබඳ "සාරවිට" අපට පැවැසුවේ මෙවැන්නකි.

ඔබ ගැන හැඳින්වීමක් කළොත්?

මගේ නම බියුමාලි ප්‍රසංසා. ඉන්නෙ කැලණියේයි.

ඔබ වෘත්තීයක් වශයෙන් කුමක්ද කරන්නේ?

දැනට මම රැකියාවක් කරන්නේ නැහැ. නිරූපණ වැඩකටයුතු තමයි කරගෙන ඉන්නේ.

නිරූපණ ක්ෂේත්‍රයට එකතුවුණේ කොයිකාලේ වගේද?

මම හරියටම නිරූපණ ක්ෂේත්‍රයට එකතුවුණේ 2014 වර්ෂයේදියි.

ඒ සඳහා අවස්ථාව ලැබුණේ කොහොමද?

මට අවස්ථාව ලැබුණේ මම මොඩලින් ක්ලාස් එකක් සඳහා සහභාගී වුණා. එතැනින් තමයි මට නිරූපණ සඳහා අවස්ථාව ලැබුණේ.

එතැනින් පසුව ලැබුණු අවස්ථා පිළිබඳව කිව්වොත්?

දැනට මම මියුසික් වීඩියෝ දෙකක විතර කරලා තියෙනවා. ඊට අමතරව ෆැෂන් පැත්තෙන් තමයි පොටෝ ෂූට් සඳහා දායක වෙලා තියෙන්නේ.

නිරූපණය පැත්තෙන් යම්කිසි තරගයක් සඳහා දායක වීමට අවස්ථාව ලැබුණේ නැද්ද?

දැනටනම් නැහැ. ඉස්සරහට දායක වීමට හිතාගෙන ඉන්නවා.

රංගනය සඳහා අවස්ථාවක් ලැබුණොත් බාරගන්නවාද?

මම ඇත්තටම කිව්වොත් රඟපාන්න නම් කැමති නැහැ. මම මියුසික් වීඩියෝ සඳහා තමයි කැමැත්ත තියෙන්නේ. රංගනය පැත්ත ගැන නම් තාම හිතලා නැහැ.

නිරූපණය කියන්නේ පොඩි කාලේ ඉඳන් තිබ්බ සිහිනයද?

පොඩි කාලේ ඉඳන්ම නෙමෙයි. මට තේරෙන කාලේ ඉඳන්ම ආසාවක් තිබ්බා නිරූපිකාවක් වෙන්න.

වර්තමානයේ නිරූපණ ක්ෂේත්‍රය පිළිබඳව මත ගොඩනැගෙනවානේ, ඒ පිළිබඳව ඔයා දකින්නේ කොහොමද?

ඒ දේවල් වෙන්නේ නිරූපණ ක්ෂේත්‍රයේ ඉන්න ඇතැම් අයගේ වැඩ අනුව සහ කටකතා අනුව තමයි.

ඔබ හිතනවද තරුණියක් සඳහා නිරූපණ ක්ෂේත්‍රයට උචිතයි කියලා?

හරියට කරනවානම් සහ හොඳට කරනවා නම් කරගෙන ඉන්න පුළුවන්. මේ දේ තරුණියන්ට ගැළපෙනවා. මේකත් එක වෘත්තියක් නේ.

නිරූපණ ක්ෂේත්‍රයට අදකාලේ හොඳ ඉල්ලුමක් තියෙනවා කියලා ඔබ හිතනවාද?

නිරූපණ ක්ෂේත්‍රයට එක පැත්තකින් නෙමේ හැම පැත්තකින්ම හොඳ ඉල්ලුමක් තියෙනවා. මොකද මොඩලින් ෂෝ සහ රූපවාහිනි වෙළෙඳ දැන්වීම් සඳහා අනිවාර්යයෙන්ම නිරූපණ ශිල්පිනියක හෝ ශිල්පියෙක් ඕන වෙනවනේ.

එහි ගෙවීම් කටයුතු සාධාරණව ඉෂ්ට වෙනවාද?

ගොඩක් තැන්වල සාධාරණයක් තියෙනවා. සමහර තැන්වල අසාධාරණකමුත් වෙනවා.

උදව් කරපු අය ගැන කිව්වොත්?

ගොඩක් මට උදව් කළේ මගේ යහළුවෝම තමයි. ගොඩක්ම තනියම තමයි මම මේ දේවල් කරගන්නේ.

ගෙදරින් සහයෝගයක් ලැබෙන්නේ නැද්ද?

සහයෝගය ලැබෙනවා. ගෙදරින් ඉඩ දෙනවානේ මේ දේවල් කරන්න.

ඩිලාන් ක්‍රිෂාන්ත