(අංජුල මහික වීරරත්න)

චීනය සහ ශ්‍රී ලංකාව අතර සහයෝගීතාවයේ ඇති අපූර්වත්වය වන්නේ දෙරටේ පරමාර්ථයන්ට අනුගතව හා අනුකූලව දෙරටම සෑම විටම කටයුතු කර තිබීම යැයි ජනාධිපති රනිල් වික්‍රමසිංහ මහතා චීනය "එක් තීරයක් එක් මාවතක්" යෝජනාව ඉදිරිපත් කිරීමේ 10 වැනි සංවත්සරය සැමරීමේ උත්සවයට සුබ පැතුම් පනිවිඩයක් එවමින් සඳහන් කරයි.

චීන මාධ්‍ය සමූහයේ ආසියා සහ අප්‍රිකා භාෂා වැඩසටහන් මධ්‍යස්ථානය කොළඹ විශ්ව විද්‍යාලයේ ශ්‍රී පාලි මණ්ඩපය සමග සහයෝගීත්වයෙන් "එක් තීරයක් එක් මාවතක්" යෝජනාව ඉදිරිපත් කිරීමේ 10 වැනි සංවත්සරය මෙන්ම "සේද හරසර" රූපවාහිනී වැඩසටහන විකාශය කිරීමේ 5 වැනි සංවත්සරය සැමරීම වෙනුවෙන් විද්වත් සංවාදය කොළඹ පදනම් ආයතනයේ දී පැවැත්විණි.

ප්‍රවාහන, මහා මාර්ග හා ජනමාධ්‍ය අමාත්‍ය ආචාර්ය බන්දුල ගුණවර්ධන, ශ්‍රී ලංකාවේ චීන තානාපති කාර්යාලයේ නියෝජ්‍ය දූත මණ්ඩල ප්‍රධානී Zhu Yanwei මහත්වරු මෙහි ප්‍රධාන ආරාධිතයෝ වූහ.

කොළඹ විශ්ව විද්‍යාලයේ ශ්‍රී පාලි මණ්ඩපයේ ජනමාධ්‍ය අධ්‍යයන අංශ ප්‍රධානී ආචාර්ය සුගත් සෙනරත්, ක්වාලාලම්පූර් විශ්ව විද්‍යාලයේ ජ්‍යෙෂ්ඨ කථිකාචාර්ය මහාචාර්ය සමිත හෙට්ටිගේ, කොළඹ විශ්ව විද්‍යාලයේ ආර්ථික අධ්‍යයන අංශයේ මහාචාර්ය ප්‍රියංග දුනුසිංහ,පදනම් අයතනයේ සභාපති සමන් අතාවුදහෙට්ට මහත්වරු දෙසුම් පැවැත්වූහ.