තමා ඡන්දයකට ඉදිරිපත් වුවහොත් කොළඹ දිස්ත්‍රික්කයෙන් මනාප ඡන්ද තුන්ලක්ෂයක් ලෙහෙසියෙන් ගත හැකි බව බස්නාහිර පළාතේ ජ්‍යෙෂ්ඨ නියෝජ්‍ය පොලිස්පති අනුර සේනානායක මහතා  කොටුව මහේස්ත්‍රාත් උසාවියේදී අද පැවසීය.

ඔහු එසේ පැවසුයේ තමාගේ පැමිණිල්ල විභාග කිරීමට ඔහු හවුල් කර නොගන්නැයි ශ්‍රී ලංකා නීතීඥ සංගමයේ සභාපති  උපුල් ජයසුරිය මහතා කැර ඇති ඉල්ලීමක් සඳහන් කරමිනි.

අනුර සේනානායක මහතා මෙසේ ද කීවේය.

‘මම අවුරුදු සීයයක් ජීවත් වුණත්  පොලීසිය වෙනුවෙන් මා සේවය කරනවා. මහජනයා  එය අගය කරනවා.ඔහුගේ පැමිණිල්ල  ගැන මා කරන පරීක්ෂණයට ඔහු අකමැති වීම ගැන මා බලවත්සේ කම්පාවට පත් වුණා.මා කියන්නේ ඇත්තයි.මේ සිද්ධිය ගැන අහවල් විදියට පරීක්ෂණ කරන්නැයි කිසිවකුගෙන් මා උපදෙස් ගත්තේ නෑ.කිසිවකු මට උපදෙස් දුන්නෙත් නෑ.පෞද්ගලික හේතු මත මේ පරීක්ෂණයෙන් ඉවත් විය යුතු බව මා පොලිස්පතිට ලියා දැන්වූවා.ඉන්පසු පරීක්ෂණය  ජ්‍යෙෂ්ඨ නියෝජ්‍ය පොලිස්පති ගාමිණි නවරත්නට බාර දී තිබෙනවා‘.