නිව්යෝක් නුවර එක්සත් ජාතීන්ගේ සංවිධාන මූලස්ථානයේ පැවැත්වෙන එක්සත් ජාතීන්ගේ 71 වැනි මහා මණ්ඩල රැස්වීම ඇමතීම සදහා ජනාධිපති මෛත්‍රීපාල සිරිසේන මහතා  ඇතුළු ශ්‍රී ලංකා ධුත පිරිස ඉරිදා (18)   ඇමරිකාව බලා යාමට නියමිතය.

එක්සත් ජාතීන්ගේ මහා මණ්ඩල සැසිය ලබන මස 19 වැනි දා සිට 26 වැනි දා දක්වා පැවැත්වෙන් අතර මෛත්‍රීපාල සිරිසේන මහතා සැප්තැම්බර් 21 වැනි දා සමුළුව ඇමැතීමට නියමිතය.

සිරිසේන මහතා ජනාධිපති ධූරයට පත් වීමෙන් පසුව එක්සත් ජාතීන්ගේ වාර්ෂික මහා මණ්ඩල සැසියක් අමතන දෙවැනි අවස්ථාව මෙය වේ. ලබන මස පැවැත්වෙන එක්සත් ජාතීන්ගේ මහා මණ්ඩල සමුළුව මෙවර තුන් ආකාරයකින් වැදගත්වේ. ඒ මහා මණ්ඩල රැස්වීමට සමගාමීව ඇමරිකාව සහ ජගත් සංවිධානය එක්ව සංවිධාන කරන සරණාගතයන් සහ සංක්‍රමණිකයන් පිළිබද සමුළුව නිව්යෝක් නුවරදී සැප්තැම්බර් 19 වනදා සහ 20 වැනි දා පැවැත්වීමයි. එම සමුළුව ඇමෙරිකා ජනාධිපති බැරැක් ඔබාමා විසින් මෙහෙයවනු ලබන අතරල ඔහු මෙවර එක්සත් ජාතීන්ගේ  මහා මණ්ඩලය අමතනු ලබන්නේ අවසන් වතාවටයි.

වසර 10 ක් එක්සත් ජාතීන්ගේ මහලේකම්වරයා ලෙස කටයුතු කළ බෑන්කී මූන් ද මෙවර මහා මණ්ඩල සමුළුවේදී සිය සමුගැනීමේ දේශනය පැවැත්වීමට නියමිතය. දකුණු කොරියාවේ හිටපු විදේශ ඇමතිවරයකු වූ බෑන්කී මූන් ලබන වසරේ ජනවාරි මාසයේ නැවත සියරට බලා ගිය පසු එරට ජනාධිපති ධුරය සදහා තරග කිරීමට සැලසුම් කර ඇති බව සදහන්වේ.