අභ්‍යන්තර මාර්ග සහ අධිවේගී මාර්ගවලට හානි වීම වළක්වා ගැනීම සඳහා නගර තුළ සහ නගරවලින් පිටත දී ට්‍රක් සහ ටේ්‍රලර් රථ  සඳහා විශේෂ මංතීරු හඳුනා ගන්නා ලෙසට මධ්‍යම නගර සභා කවුන්සලය ප්‍රවාහන අමාත්‍යාංශයෙන් ඉල්ලීමක් කර තිබේ.

පසුගිය සතියේ රැස්වූ මධ්‍යම නගර සභාව මධ්‍යම වෙළෙඳපොලේ අදාළ බලධාරීන්ට සිය නිර්දේශයන් සහ අධික බර පැටවූ ට්‍රක් රථ සහ ටේ්‍රලර් නිසා මහා මාර්ගවලට සිදුවන බලපෑම් ගැන දැනුම් දී තිබේ.

පොදුවේ ගත් කල අධික බර පැටවූ ට්‍රක් රථ සහ ටේ්‍රලර් නිසා මහා මාර්ගවලට සිදුවන බලපෑම් සම්බන්ධයෙන් පසුගිය වසරේ දී අනුමත කරන ලද නිර්දේශයන් නැවත ක්‍රියාවට නංවන ලෙස ද නගර සභාව ඉල්ලීමක් කර ඇත.

මෙම නිර්දේශයන්ගේම කොටසක් ලෙසින් කර්මාන්ත පුරවරයට ඇතුළු වන සහ පිටවන ස්ථානයන්හි බර පාලම් ප්‍රමාණය ඉහළ නංවන ලෙසට වන නිර්දේශයක් ද මධ්‍යම නගර සභාව විසින් පොදු වැඩ අධිකාරියට (අෂ්ගාල්) නිකුත් කර ඇත.

අංක 1 ඡන්ද බල ප්‍රදේශය නියෝජනය කරන නගර සභික ජාසෙම් අබ්දුල්ලාහ් අල් මල්කි විසින් සිදුකරන ලද යෝජනාවකට අනුව ඉහත නිර්දේශයන් සකස් කර ඇත.

“විශේෂයෙන්ම ගිම්හාන කාලයේ දී අධි බර සහ යන්ත්‍ර සූත්‍ර පැටවූ ට්‍රක් රථ සහ ටේ්‍රලර් නිසා අලුතින් සාදන ලද අභ්‍යන්තර සහ අධිවේගී මාර්ගයන්ට සිදුවන බලපෑම ගැන අනාවරණය වුණා”

“මේ ගැන නගර සභිකයන් කිහිප වරක්ම ප්‍රශ්න කළා. ඒ වගේම අදාළ බලධාරීන් සමග මේ සම්බන්ධයෙන් සාකච්ඡා කළා. අදාළ බලධාරීන්ට අපේ නිර්දේශයන් ලබාදුන්නා. ඒත් තාමත් මේ ප්‍රශ්නයට හරි විසඳුමක් ලැබිලා නැහැ” යැයි ඔහු පවසයි. 

නීති උල්ලංඝනය කරන ට්‍රක් රථ නිරීක්ෂණය කරන ලෙසට මෝටර් රථ දෙපාර්තමේන්තුවට කරන ලද ඉල්ලීමක් මෙන්ම අධික බරක් පටවාගෙන ධාවනය කරන ට්‍රක් රථ මාර්ගයේ ඒවාට නියමිත මංතීරුවේ ධාවනය කරන බවට වගබලාගත යුතුයි යන ඉල්ලීම් ද ඉහත නිර්දේශයන්ට ඇතුළත් වෙයි.