ආවරණය කරන ලද ප්‍රසිද්ධ ස්ථානවල දුම්බොන්නන්ට දැඩි දඬුවම් නියම කෙරෙන දුම්කොළ විරෝධී නීතිය නිකුත් කිරීම සඳහා අවශ්‍ය කරන පියවර ගැනීමට කටාර් කැබිනට් මණ්ඩලය කටයුතු කර තිබේ.

නව නීතිය හරහා දුම්කොළ සහ දුම්කොළ අඩංගු නිෂ්පාදන ආනයනය කිරීම සහ පාවිච්චි කිරීම වැළැක්වීමට දැඩි ක්‍රියාමාර්ග හඳුන්වා දී ඇති අතර “ස්වෙයිකා” යනුවෙන් හැඳින්වෙන ඉලෙක්ට්‍රොනික් දුම්වැටි මෙන්ම වෙනත් සැපීමට ගන්නා දුම්කොළ නිෂ්පාදන ද තහනම් කර තිබේ.

නීති කෙටුම්පත් සම්බන්ධයෙන් උපදේශනාත්මක කවුන්සලය ඉදිරිපත් කර තිබූ නිර්දේශ සලකා බැලීමෙන් පසුව කැබිනට් මණ්ඩලය ඉහත තීරණය ගෙන තිබේ.

නව නීතිය නිකුත් කළ විට දැනට පවතින 2002 අංක 20 දරන දුම්කොළ විරෝධී නීතිය වෙනුවට නව නීතිය බලාත්මක වනු ඇත.

දේශීය වෙළෙඳපොලේ ඉන්ධන මිල ගණන් සමාලෝචනය කිරීම සඳහා ස්ථාවර කමිටුවක් ස්ථාපිත කිරීම සඳහා වන තීරණයකට ද කැබිනට් මණ්ඩලයේ අනුමැතිය හිමිව ඇත.

මෙම කමිටුවේ ප්‍රධානත්වය බලශක්ති සහ කර්මාන්ත අමාත්‍යාංශයේ නියෝජිතයකුට හිමි විය යුතු අතර අදාළ අනෙක් ආයතනවල නියෝජිතයන් සාමාජිකයන් වශයෙන් පත්විය යුතු බව ද එම පනත් කෙටුම්පතේ සඳහන් වෙයි.

මෙම කමිටුවේ ප්‍රධානම විෂය පථය වනුයේ දේශීය වෙළෙඳපොලේ ඉන්ධන මිල ගණන් ලිහිල් කිරීමේ රජයේ සැලසුම ක්‍රියාවට නැංවීම බව කටාර් පුවත් ඒජන්සිය පසුගියදා පැවැසීය.

එමීර් දිවාන් හි පැවැති කැබිනට් රැස්වීමේ මුලසුන අගමැති සහ අභ්‍යන්තර අමාත්‍ය ෂෙයික් අබ්දුල්ලාහ් බින් නාසර් බින් කාලීෆා අල් තානි මහතා දරනු ලැබීය.

විදේශ අමාත්‍යාංශයේ සංවිධානාත්මක ව්‍යූහය සම්බන්ධයෙන් වූ එමීර් තීන්දුවකට ද කැබිනට් මණ්ඩලයේ අනුමැතිය හිමිවිය.

සමහර ආයතනවල සේවය කරන කටාර් සේවකයන්ගේ විශ්‍රාම ගැනීම සහ විශ්‍රාම වැටුප් සම්බන්ධයෙන් 2002 අංක 24 දරන නීතියේ රෙකුලාසි ක්‍රියාත්මක කිරීමට ද කැබිනට් රැස්වීමේදී එකඟත්වයක් ඇතිව තිබේ.