භාරත ලක්ෂ්මන් ප්‍රේමචන්ද්‍ර මහතා ඇතුළු සිව් පුද්ගල ඝාතනයේ 17 වැනි සැකකරු වශයෙන් නම් කැර ඇති පාර්ලිමේන්තු මන්ත්‍රී දුමින්ද සිල්වා සම්බන්ධයෙන් නීතිපති උපදෙස් ඉල්ලා ඇතැයි රහස් පොලීසිය කොළඹ අතිරේක මහේස්ත්‍රාත් ප්‍රසන්න අල්විස් මහතා හමුවේ අද කියා සිටියේය. ජනාධිපති උපදේශකයකු වූ ප්‍රේමචන්ද්‍ර මහතා ඇතුළු සිව් දෙනෙක් ගිය වසරේ ඔක්තෝබර අට වැනිදා මුල්ලේරියාවේදී වෙඩි තබා ඝාතනය කිරීම සම්බන්ධයෙන් දුමින්ද සිල්වා මහතා සැකකරුවකු වශයෙන් නම් කරනු ලැබ සිටී. එම සිද්ධියේදී වෙඩි වැදුණු දුමින්ද සිල්වා දැන් සිංගප්පූරුවේ මවුන්ට් එළිසබෙත් රෝහලේ ප්‍රතිකාර ලබයි. ඔහු එහි ගෙනයාමට පෙර ප්‍රතිකාර ලැබූයේ ශ්‍රී ජයවර්ධනපුර රෝහලේදී ය. එහිදී ඔහුට කළ සැත්කම්වලින් ඉවත් කළ හිස්කබලේ කොටස් ඉදිරි පරීක්ෂණවලට අවශ්‍ය විය හැකි හෙයින් සුරක්ෂිතව තබන ලෙස රෝහල් අධ්‍යක්ෂට දන්වන්නැයි දුමින්ද සිල්වා වෙනුවෙන් පෙනී සිටි නීතීඥවරයෙක් ඉල්ලා සිටියේය.