(යොහාන් භාසුර)

අපොස උසස් පෙළ විභාගයේ කලා විෂය ධාරාවේ මහනුවර දිස්ත්‍රික්කයේ පළමු ස්ථානය ගෙලිඔය ශ්‍රී පඤ්ඤාරතන මධ්‍ය මහා විද්‍යාලයේ දෘශ්‍යාබාධිත ශිෂ්‍යයෙක් වන තිවංක රණබාහු ප්‍රේමලාල් හිමිකරගැනීමට සමත්විය.

තිවංක කලා විෂය ධාරාවෙන් සමස්ත ලංකා 75 වැනි ස්ථානයට පත්ව සිටින අතර ඔහු වාචික ක්‍රමයට උසස් පෙළ විභාගයට පෙනී සිටි සිසුවෙකි.

ඔහු වයස අවුරුදු 15 දී 2018 වසරේ පූර්ණ දෘශ්‍යාබාධිත තත්වයට පත්ව ඇති බවත් සංගීත ඩිප්ලෝමා ධාරිනියක් වන ඔහුගේ මව නිරෝෂනී සුජීවා කුමාරි මහත්මිය පොත් කියවීමෙන් විභාගයට සූදානම් කර තිබේ.

මෙම ජයග්‍රහණය පිළිබඳව කළ විමසුමේදී තිවංක පැවසුවේ ජයග්‍රහණය පිළිබඳව සතුටු වන බවත් මහනුවර දිස්ත්‍රික්කයේ ඉතිහාසයේ ඕනෑම විෂය ධාරවකින් දෘශ්‍යාබාධිත ශිෂ්‍යයෙක් පළමු ස්ථානය ලැබූ පළමු අවස්ථාව මෙය බවත්ය.

“සාමාන්‍ය පෙළ විභාග ආසන්නයේ තිබියදීයි මගේ ඇස් පෙනීම නැතුව ගියේ. වෛද්‍යවරු පවසන්නේ ඇස් පෙනී නැතිවීමට හේතුවෙක් නොමැති බවයි. ඇස් පෙනීම නැවත ගන්න ප්‍රතිකාර කරනවා” යැයි ද තිවංක පැවසීය.