ශ්‍රී ලංකා ක‍්‍රිකට් ආයතනයේ නිලවරණය කිසිඳු බලපෑමකින් තොරව ස්වාධීනව පැවැත්වූ බවට තමන් වගකීමෙන් ප‍්‍රකාශ කරන බව නිලවරණය මෙහෙය වු ක‍්‍රීඩා අධ්‍යක්‍ෂ ජනරාල් රංජනී ජයකොඩි මහත්මිය ක‍්‍රීඩා විද්‍යායතනයේදී පැවැති මාධ්‍ය හමුවකදී පැවසුවාය. මෙම නිලවරණයේදී ශ්‍රී ලංකා ක‍්‍රිකට් ආයතනයේ ව්‍යවස්ථාව උල්ලංඝනය කළ බවට චෝදනා කරමින් එක පාර්ශයක් ඡුන්දයෙන් ඉවත් වීම පිළිබඳව ජයකොඩි මහත්මිය මෙසේ පැවසුවාය. ‘‘මම එහිදී කටයුතු කලේ ක‍්‍රීඩා පනතට අනුවයි, ක‍්‍රීඩා පනත පාර්ලිමේන්තුවෙන් සම්මත වෙච්ච පනතක් නිසා එම පනත ඔය හැම එකකටම වඩා උසස්, මෙම ඡුන්ද විමසීමට නියෝජිතයන් 135 දෙනකු පැමිණ සිටියා, අපි එහිදී එක තනතුරකට පමණක් ඡුන්ද විමසුමක් සිදු කළා’’ යැයි ද ඇය පැවසුවාය. කළුතර දිස්ත‍්‍රික් ක‍්‍රිකට් සංගමයේ ලේකම්වරයාට අධිකරණය වෙතින් වාරණයක් පනවා තිබියදී, එම නිලධාරියා ඡන්දය ප‍්‍රකාශ කිරීමෙන් ද වැලකී සිටි තත්ත්වයක ඔහු විනිසුරු කමිටුවට පත්වීම පිළිබඳව ද මෙහිදී මාධ්‍යවේදීහූ ක‍්‍රීඩා අධ්‍යක්‍ෂ ජනරාල්වරියගෙන් ප‍්‍රශ්න කළහ. එහිදී ඇය පැවසුවේ එවැනි වාරණයක් පනවා ඇති බවට තමන්ට දැනුම්දී නොමැති බවත් ඒ මහතා බදුරලිය ක‍්‍රීඩා සමාජය නියෝජනය කරමින් නිතරගයෙන් තේරීපත් වී ඇති බවත්, මේ සම්බන්‍ධයෙන් කිසියම් විරෝධතාවක් ඉදිරිපත් කළහොත් ඒ ගැන පරීක්‍ෂණයක් පැවැත්විය හැකි බවයි.