යුද්ධයෙන් අතුරුදන් වූවන් ගැන සෙවීමට 2013 දී හිටපු ජනපති මහින්ද රාජපක්ෂ මහතා විසින් පත් කැරුණු මැක්ස්වෙල් පරණගම කොමිසම හමුදාවට සුදු හුණු ගෑමේ උත්සාහයක් බව බොහෝ දෙනා සැක සංකා පහළ කළත් පුදුමයකට මෙන් එම කොමිසන් වාර්තාව ගිය රජයට චෝදනා පත්‍රයක් වී ඇතැයි ඉකොනොමි නෙක්ස්ට් වෙබ් අඩවිය කියයි.

2009 මැයි මාසයේදී අවසන් වූ 37 අවුරුදු ජනවාර්ගික යුද්ධයේදී රජයේ හමුදා දෙමළ කොටි කැරලිකරුවන් සුණු විසුණු කර දැමීමේදී මානව හිමිකම් කඩවූයේ දැයි සොයා බලන ලෙස පරණගම කොමිසමට නියෝග කැරිණි.

රාජපක්ෂ පරාජය වී මාස 8කට පසු 2015 අගෝස්තු මාසයේදී නිකුත් කළ එම කොමිසම කියනුයේ යුද අපරාධ වී යැයි කියන චෝදනා විශ්වාස කළ හැකි බවයි.

හමුදා අණ දෙන නිලධරයනට එරෙහිව අපරාධ චෝදනා ගොනු කිරීමේ ඉඩකඩද ඇති බව එම කොමිසම කියයි.

බ්‍රිතාන්‍යයේ චැනල් 4 රූපවාහිනියේ ‘නෝ ෆයර් සෝන් ශ්‍රී ලංකා කිලින්ග් ෆීල්ඩ්ස්‘ වීඩියෝ පටය බොරු නොවන බව සැලකිය හැකි යැයිද එම වීඩියෝවෙන් මතු කරන චෝදනා අධිකරණ පරීක්ෂණයකට භාජනය කිරීම වටින්නේ යැයිද කියයි.

චැනල් 4 වීඩියෝවේ රූපරාමු සත්‍ය බව පරණගම කොමිසම පිළිගෙන ඇතැයිද ඉකොනොමි නෙක්ස්ට් වෙබ් අඩවිය පවසයි.

එක්සත් ජාතීන්ගේ සංවිධානය පිළිගත්, ගිනි අවි පිළිබඳ ලෝක ප්‍රකට විද්‍යාඥයන් ඇතුළු විශේෂඥයන් කිහිප දෙනකුගෙන් මෙම වීඩියෝව සත්‍ය බවට තහවුරු කරගෙන ඇතැයිද ඒ අනුව කොමිසමද එම උපකල්පනය පිළිගෙන ඇතැයිද පරණගම කොමිසම වාර්තා කරයි.

සාක්කි ඉදිරිපත් වුවහොත් එම උපකල්පනය ඉවත් කළ හැකි යැයිද එම වාර්තාව සඳහන් කරයි.

ඉදිරිපත්වී ඇති චෝදනා කිසියම් විශ්වාසයකින් යුතුව හමුදාව ලවා පරීක්ෂා කිරීම ගැන බලාපොරොත්තු තැබිය නොහැකි බවත් ඒ සඳහා ජාත්‍යන්තර සෝදිසිය යටතේ ස්වාධීන අධිකරණ නිරීක්ෂණයක් විය යුතු යැයිද පරණගම කොමිසම සඳහන් කරන බව එම වෙබ් අඩවිය කියයි.

චැනල් 4 වීඩියෝ පටයේ රූප රාමු ගැන යුද හමුදාපති ක්‍රිෂාන්ත ද සිල්වා පැවැත්වූ පරීක්ෂණයේදී හමුදාව කිසිම වරදක් නොකළ බවට කර ඇති සඳහන් නිසාම කොමිසම එසේ කියා ඇති බව පැහැදිලිය.

පිටු 100 ක ඇමිණුම් ද සහිතව පිටු 179 කින් යුත් මෙම වාර්තාව එක්සත් ජාතීන්ගේ මානව හිමිකම් කවුන්සිලයේදී සම්මතවූ යෝජනාවටද වඩා ඈතට යමින් යෝජනා කර ඇත්තේ දේශීය යුද අපරාධ විමර්ශන යාන්ත්‍රණය සඳහා විදේශ මැදිහත්වීමක් ඇතිකරගත හැකි බවයි.

ගැම්බියාවේ මෙන් විදේශ විනිසුරුවරුන්ගේ සේවය ලබාගැනීම පිළිබඳව විනිසුරු පරණගම දැඩි ලෙස නිර්දේශ කරයි.

ශ්‍රී ලංකා නීති පද්ධතිය යටතේ යුද අපරාධ ඒකකයක් වෙනමම පිහිටුවිය යුතු බව විනිසුරු පරණගම යෝජනා කරයි. ශ්‍රී ලංකාවේ ආණ්ඩුක්‍රම ව්‍යවස්ථාව යටතේ ශ්‍රී ලංකාව අන්තර්ජාතික මානව හිමිකම් නීතිය පිළිපදින රටක් බවට පත් කළ යුතු යැයි ඔහු අවධාරණය කරයි.