(සුජිත් හේවාජුලිගේ සහ  අංජුල මහික වීරරත්න)

ශ්‍රී ලංකා ප්‍රමිති ආයතනයේ අධ්‍යක්ෂ ජනරාල් තනතුර සඳහා සුදුසුකම් සම්පූර්ණ නොකළ නිලධාරියකු පත් කිරීම සම්බන්ධයෙන්  පොදු ව්‍යාපාර පිළිබඳ පාර්ලිමේන්තු කාරක සභාවේ (කෝප් කමිටුව) අප්‍රසාදය පළවිය.

මේ සම්බන්ධයෙන් විමර්ශනයක් පවත්වා වාර්තාවක් සති දෙකක් ඇතුළත ඉදිරිපත් කරන ලෙස කමිටුව  අමාත්‍යාංශ ලේකම්වරයාට උපදෙස් දුන්නේය.

මේ අතර ශ්‍රී ලංකා ප්‍රමිති ආයතනයේ ප්‍රමිතිය වැඩි කිරීමට කටයුතු කළ යුතු යැයි පොදු ව්‍යාපාර පිළිබඳ පාර්ලිමේන්තු කාරක සභාව එහි නිලධාරීන්ට  උපදෙස් දී ඇත.

ශ්‍රී ලංකා ප්‍රමිති ආයතනය 2020 වසරේ සිට වාර්ෂික වාර්තා පාර්ලිමේන්තුවට ඉදිරිපත් නොකිරීම සම්බන්ධයෙන් කමිටුවේ අප්‍රසාදය පළවිය.  එම වාර්තා කඩිනමින් ඉදිරිපත් කරන ලෙසටද නියෝග කෙරිණ.

ශ්‍රී ලංකා ප්‍රමිති ආයතනයේ පසුගිය වසර පහක කාලයේදී සිදුවී ඇති අක්‍රමිකතා සම්බන්ධයෙන් ස්වාධීන පරීක්ෂණයක් පැවැත්වීමටද  කෝප් කමිටුව නියෝග කළේය.

ආයතනයේ ක්‍රියාවලිය පුළුල් කිරීම සඳහා ජාතික විශ්වවිද්‍යාල මෙන්ම  පෞද්ගලික අංශයේද සහාය ලබා ගන්නා ලෙස කෝප්  කමිටුව නිර්දේශ කළේය.

මේ අතර එස්එල්එස් ලාංඡනය නොමැති ටින් මාළු වෙළෙඳ පොළේ අලෙවි කෙරෙන බව කෝප් කමිටුවේදී තොරතුරු අනාවරණය විය.

එම ලාංඡනය ලබාගෙන ඇත්තේ ටින් මාළු ආයතන පහළොවක් පමණක් බව ආයතනයේ සභාපතිවරයා පැවසීය.

ශ්‍රි ලංකා ප්‍රමිති ආයතනය ප්‍රධානීන් මාස 3 කින් නැවත කැඳවීමටද කෝප් කමිටුව තීරණය කළේය.

මෙම සාකච්ඡාවට රාජ්‍ය අමාත්‍යවරුන් වන ජානක වක්කුඹුර ලොහාන් රත්වත්තේ සහ ශාන්ත බණ්ඩාර මන්ත්‍රීවරුන් වන රවුෆ් හකීම් අනුර ප්‍රියදර්ශන යාපා ඉරාන් වික්‍රමරත්න නිමල් ලංසා  සංජීව එදිරිමාන්න උපුල් මහේන්ද්‍ර රාජපක්ෂ ,රාජිකා වික්‍රමසිංහ, මධුර විතානගේ සහ  මහාචාර්ය චරිත හේරත් යන මහත්ම මහත්මීහුද  තාක්ෂණ අමාත්‍යාංශයේ ලේකම් මහාචාර්ය නිරන්ජන් ගුණවර්ධන ,ශ්‍රී ලංකා ප්‍රමිති පමිති ආයතනයේ  සභාපති අසංග රණසිංහ, අධ්‍යක්ෂ ජනරාල් සිද්ධිකා  සේනාරත්න  යන මහත්ම මහත්මීන් ඇතුළු පිරිසක්ද සහභාගි වූහ.