(ඉන්දිකා රාමානයාක සහ ශ්‍රිනාත් ප්‍රසන්න ජයසුරිය)

විවිධ ධනවතුන් සහ දේශපාලකයන් රැසකගෙන් රුපියල් බිලියනයකට අධික මුදලක් වංචා කළ බවට කියන  තිළිණි ප්‍රියමාලි නමැත්තිය ගේ පෙම්වතා බව කියන ව්‍යාපාරික හවුල්කරු අපරාධ පරීක්ෂණ දෙපාර්තමේන්තුව අද අත්අඩංගුවට ගත්තේය.

සැකකාරිය සමග එක්ව පුද්ගලයන්ගේ මුදල් වංචා කිරීම සහ මෙම මුදල් වංචාවට ආධාර අනුබල ලබා දීම , සාවද්‍ය පරිහරණය කිරීම සම්බන්ධයෙන් මෙම සැකකරු අත්අඩංගුවට ගත් බව අපරාධ පරීක්ෂණ දෙපාර්තමේන්තු ආරංචි මාර්ග පවසයි.

විදේශ රටවලින් මෙරටට ඉන්ධන ගෙන්වා වැඩි ලාභයක් ලබා දෙන බවට පවසා සැකකාරිය හා සැකකරු තමන් ගෙන් ඕස්ට්‍රෙිලියා ඩොලර් 60,000 ක්, ඇමැරිකානු ඩොලර් ලක්ෂයක්, හා කිලෝ එකකට වැඩි රන් බඩු ප්‍රමාණයක් ලබාගෙන මුදල් වංචා කළ බවට පවසා එම කෝටිපති ව්‍යාපාරිකයා අපරාධ පරීක්ෂණ දෙපාර්තමේන්තුවට මීට පෙර පැමිණිලි කර තිබු බව පොලිස් ආරංචි මාර්ග පවසයි.

මෙම වංචා සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව කළ දැනුම් දීමකට අනුව  මෙම සැකකරු පැමිණි ඇති අතර සිද්ධිය සම්බන්ධයෙවන් පැය 9 අධික කාලයක් ප්‍රශ්න කර ප්‍රකාශ සටහන් කර ගැනීමෙන් පසු පස්වරු 6.30 ට පමණ ඔහු අත්අඩංගුවට ගත් බව අපරාධ පරීක්ෂණ දෙපාර්තමේන්තු ආරංචි මාර්ග සඳහන් කරයි.

හිටපු ප්‍රබල අමාත්‍යවරයකුගේ ලේකම්වරයකු වශයෙන් දීර්ඝ කාලයක් කටයුතු කටයුතු කර මොහු පසුව තිළිණි ප්‍රියමාලි නැමැත්තිය සමග සමීප සම්බන්ධකම් පවත්වා ඇති අතර, ඇගේ පෙම්වතා වශයෙන් කාලයක් කටයුතු කර ඇති බවද පොලිස් ආරංචි මාර්ග පවසයි.

මෙම වංචාව සම්බන්ධයෙන් තිළිණි ප්‍රියාමාලි නමැත්තිය අපරාධ පරීක්ෂණ දෙපාර්තමේන්තුව  තිළිණි ප්‍රියමාලි නැමැත්තිය කොටුව මහේස්ත්‍රාත් අධිකරණයට ඉදිරිපත් කිරීමෙන් පසු මෙම මස 19 දින දක්වා රිමාන්ඩ් බාරයට පත්කර ඇත.