අධිවේගී මාර්ගවල ගමන්කරන රථ වාහනවල රියදුරන් අතින් සිදුවන මාර්ග නීති උල්ලංඝනය ඇතුළු සෑම වැරැද්දක්ම එසැණින් අල්ලා ගැනීමේ ‘‘ප්‍රවේක්ෂා” මෘදුකාංගයක් නිර්මාණය කර දීමට මොරටුව විශ්ව විද්‍යාලයයේ පරිගණක විද්‍යා හා ඉන්ජිනේරු අංශයේ සිසුහු කණ්ඩායමක් සමත්වී සිටිති.

අංශ ප්‍රධානි ආචාර්ය චතුර ද සිල්වා ඔවුනට මඟ පෙන්වීය.

අධිවේගී මාර්ග සීසීටීවී කැමරා පද්ධතිය පරිගණකයට සම්බන්ධ කිරීමෙන් එම වැරදි හඳුනා ගැනීමට හැකි බවත්, මෙම පරිගණකය සීසීටීවී කැමරාවලට සම්බන්ධ කැරෙන බවත් ආචර්ය ද සිල්වා පැවසීය.

මේ සඳහා සාමාන්‍ය පරිගණකයක් ප්‍රමාණවත්නය. මෙහි ඇති විශේෂත්වය වනුයේ කිසිවකුගේ සහායක් නොමැතිව ස්වයංක්‍රීයව පරිගණකය ක්‍රියාත්මක වීමයි. එම නිසා පොලිසි ඒ වෙනුවෙන් වෙන්කර තැබීම අනවශ්‍ය හෙයින් මිනිස් බල පිරිමැසීමක්ද ඇතිවේ.

‘‘අධිවේගී මාර්ගයට වාහනයක් ඇතුළුවු තැන සිට ගමන අවසානය දක්වාම වාහනයෙන් සෑම වැරුද්දක්ම මෙහිදි හසුවෙයි. දවසේ පැය විසිහතර පුරාම ස්වයංක්‍රීයව ක්‍රියාත්මක වෙයි. වසරක් පුරාවට ගමන් කළ වාහන වල තොරතුරුද ගබඩා වෙයි.”

ස්වයංක්‍රීයව වැරදි හදුන්වාදෙන නිසා තරාතිරමකින් තොරව වැරදි කරන සෑම රියදුරකුම හසුවෙයි. එබැවින් අනවශ්‍ය ප්‍රශ්න වලට මැදිහත්වන්නේද නැතැයි ආචාර්ය ද සිල්වා කීවේය.

‘‘රියදුරන්ගේ අසාමාන්‍ය වැරදි පවා හසුවෙයි. යම් අපරාධයක් සිදු වුනද එයට සවිස්තරව හෙළිදරව් වෙයි. වැරදි කරන වාහනයේ එම වරද ඇතුළත් ඡායාරූපයක් ඉබේම ගබඩා වෙයි. එම නිසා තමන් වරදක් නොකළ බවට යම් රියදුරකු අභියෝග කළහොත් එම ඡායාරූපය ප්‍රභල සාක්කියකි.”

‘‘මෙම මෘදුකාංගය ආනයනය කළේ නම් ඒ සදහා රුපියල් මිලියන ගානක් වැය කිරීමට සිදුවෙයි.”

අධිවේගි මාර්ග සම්බන්ධ බලධාරින්ට මෙය අවැසිනම් එය නොමිලේ ලබා දීමට හැකි බව ශිෂ්‍ය කණ්ඩායම කියයි.

ඊට අමතරව තවත් වැඩි දියුණු කිරීම් අවැසි නම් ඒ සියල්ල ඉටු කර දීමට හැකි බවද ඔවුහු කියති.

ශාක්‍ය සේනාරත්න, ජයමාල් ද වාස් ගුණවර්ධන, පැතුම් ද සිල්වා, මංජුල පියුමාල් නමැති අවසන් වසරේ ශිෂ්‍ය කණ්ඩායම් මෙම නිර්මාණය සිදු කර ඇත.

ආචාර්ය චන්දන ගමගේ, ආචාර්ය මාලක වල්පොල සහ අංශ ප්‍රධානි ආචාර්ය චතුර ද සිල්වා මේ මෘදුකාංගයේ අධික්ෂකවරු වෙති.

DSC_0105 Integration lane-violation praveksha-in-action speed-violation