(ඉන්දිකා රාමනායක)

අපරාධ පරීක්ෂණ දෙපාර්තමේන්තුව බාර නියෝජ්‍ය පොලිස්පති ප්‍රසාද් රණසිංහ මහතා ඇතුලු නියෝජ පොලිස්පතිවරුන් දෙදෙනකුට සහ පොලිස් ස්ථානාධිපතිවරුන් පස් දෙනකුට වහාම ක්‍රියාත්මක වන පරිදි ස්ථාන මාරුවීම් ලබා ද ඇති බව පොලිස් මුලස්ථානය පවසයි.

අපරාධ පරීක්ෂණ දෙපාර්තමේන්තුව බාර නියෝජ්‍ය පොලිස්පති ප්‍රසාද් රණසිංහ මහතා එම තනතුරේ සිට පොලිස් මුලස්ථානයට ස්ථාන මාරුවීම් කර ඇති අතර ඒ මහතාගෙන් හිස් වු අපරාධ පරීක්ෂණ දෙපාර්තමේන්තුව බාර නියෝජ්‍ය පොලිස්පති තනතුරට මාතර හා හම්බන්තොට දිසාව බාර නියෝජ්‍ය පොලිස්පති ඩබ්ලිව් තිලකරත්න මහතා පත්කර ඇති බව පොලිස් මුලස්ථාන පවසයි.

මේ අතර ගාල්ල දිසාව බාර නියෝජ්‍ය පොලිස්පිව සිටි නුවන් වෙදසිංහ එම තණතුරට අමතරව මාතර හා හම්බන්තොට දිසාව බාර නියෝජ්‍ය පොලිස්පතිවරයා වශයෙන්ද පත්කර ඇත.

ස්ථාන මාරුවීම් ලැබු ස්ථානාධිපතිවරුන් පස් දෙනා අතර කොළඹ අපරාධ කොට්ඨාසයේ සිටි ප්‍රධාන පොලිස් පරීක්ෂක ඒ ජී එස් සුසන්ත මහතා මුල්ලේරියාව පොලිස් ස්ථානාධිපති වශයෙන් ද, මහනුවර කොට්ඨාසයේ සිටි ප්‍රධාන පොලිස් පරීක්ෂක ආර් පී අයි සංජීව මහතා පල්ලෙවෙල පොලිස් ස්ථානාධිපතිවරයා වශයෙන් ද, මහනුවර කොට්ඨාසයේ සිටි ප්‍රධාන පොලිස් පරීක්ෂක ආර් ඒ පී රණසිංහ මහතා පොත්තපිටිය පොලිස් ස්ථානාධිපතිවරයා වශයෙන් ද, පොද්දල පොලිස් ස්ථානාධිපතිවරයා වශයෙන් සිටි ප්‍රධාන පොලිස්පරීක්ෂක පී එස් සී සංජීව මහතා මොනරාගල මුලස්ථාන පොලිස් පරීක්ෂක වශයෙන් ද , ඇතිමලේ පොලිස් ස්ථානාධිපති වශයෙන් සිටි ප්‍රධාන පොලිස් පරීක්ෂක බී. එන් බුලත්සිංහල මහතා බණ්ඩාරවෙල කොට්ඨාසයේ සාමන්‍ය රාජකාරි සදහා ද, නුගේගොඩ කොට්ඨාසයේ සිටි පොලිස් පරීක්ෂක ඩබ්ලිව් ඒ බී අරෝෂන් මහතා ගොතටුව පොලිස් ස්ථානාධිපති වශයෙන් ද, පත්කර ඇති බව පොලිස් මුලස්ථානය ආරංචි මාර්ග පවසයි.

සේවයේ අවශ්‍යතාව මත මෙම ස්ථාන මාරුවීම් සිදුකර ඇති බව පොලිස් මුලස්ථාන ආරංචි මාර්ග වැඩිදුරටත් පවසයි.