පාවිච්චි කළ යන්ත්‍ර බව හඟවා රුපියල් එක්කෝටි තිස් ලක්ෂයක් වටිනා මොන්ටේරෝ ජිප් රියක්, මිනි කූපර් හා ටොයොටා කාරයක් ඇතුළු වාහන තුනක් හොරෙන් ගෙන්වූ බව කියන තිහගොඩ ව්‍යාපාරිකයකුට රේගුව රුපියල් හය කෝටි තිස් දෙලක්ෂයක දඩ නියම කළේය.

කන්ටේනරයේ තිබූ වාහන අමතර කොටස් ද වාහනද රාජසන්තක කළ බව රේගු මාධ්‍ය ප්‍රකාශක ධර්මසේන කහඳව මහතා කියයි.

බස්නායක නිළමේවරයකු බව කියාගත් මේ පුද්ගලයා රේගුවට කළ ප්‍රකාශයක් අනුව කන්ටේනරය තිහගොඩට රැගෙන යාමට ඉඩදුන් බවත් රේගු පරීක්ෂණය එහිදී කළ බවත් වාර්තා වේ. එම දඩය ගෙවීමට අපොහොසත්වූ ව්‍යාපාරිකයා අධිකරණයට ඉදිරිපත් කරනු ලැබීය.

වරායට එන සියලු කන්ටේනර ස්කෑන් පරීක්ෂණයට ලක්කිරීමේ පහසුකම් ඇතත් මෙම කන්ටේනරය ස්කෑන් කර නැතැයි ද දේශපාලන බලපෑමක් ඊට හේතුව වන්නට ඇතැයි ද රේගු වෘත්තීය සමිති කිහිපයක් කියයි.