(නිමන්ති රණසිංහ)

මාලිගාවත්ත ප්‍රදේශයේ කාන්තාවක් මෝල්ගසකින් ගසා ඝාතනය කර ගමන් බෑගයක බහා සපුගස්කන්ද ප්‍රදේශයේ කුණු ගොඩකට ගෙනැවිත් දැමීමේ සිද්ධියට ආධාර අනුබල දුන් බව කියන අඹුසැමියන් ලබන 19 වැනිදා තෙක් රක්ෂිත බන්ධනාගාර ගත කරන ලෙස මහර මහේස්ත්‍රාත් කේමින්ද පෙරේරා මහතා අද (09) නියෝග කළේය.
මෙලෙස රක්ෂිත බන්ධනාගාර ගත කරනු ලැබුවේ සමිට්පුර, මට්ටක්කුලිය පදිංචි මොහොමඩ් සිත්ති රොෂාන් (36) සහ සෙක්කු රාජා ගනේෂ් ආනන්ද රාජා (36) නමැති අඹුසැමි යුවළ ය.

මෙම සැකකරුවන් සන්තකයේ තිබී අත්අඩංගුවට ගත් මරණකාරියට අයත් රත්‍රන් භාන්ඩ සහ මුදල් ද නඩු භාණ්ඩ වශයෙන් අධිකරණයට ඉදිරිපත් කරන බව සපුගස්කන්ද පොලීසිය අධිකරණයට කරුණු ඉදිරිපත් කර තිබිණී. එසේම,  මරණකාරියගේ දේහය රැගෙන ගිය ත්‍රීරෝද රථය ද, සැකකරුවන් විසින් උකස්කරනු ලැබ තිබූ මරණකාරියට අයත් රත්‍රන් භාණ්ඩවල උණුකරනලද රත්‍රන් ගුලියක් ද අත්අඩංගුවට ගත් බව පොලීසිය අධිකරණයට කරණු වාර්තා කර ඇත.
මෙමසිද්ධියෙන් ඝාතනයට ලක්වූයේ මාලිගාවත්ත ප්‍රදේශයේ පදිංචි හතලිස් තු-න් හැවිරිදි ෆාතිමා මුන්ටාස් නැමැත්තියය. ඇගේ සිරුර ඉකුත් 04 වැනිදා සපුගස්කන්ද මාබිම පාරේ කුණු කසල ගොඩක තිබූ ගමන් බෑගයක් තුළ තිබී සොයා ගනු ලැබීය.