(රේඛා තරංගනී ෆොන්සේකා)
 
බස්නාහිර පළාත තුළ කුණු කඳු වලට මුදාහරින කසළ නිවෙස් වලින් බැහැරලීමේදී ඉඳුල් සහ පොලිතීන් ලෙස 100% ක් වෙන් කර පළාත් පාලන අයතන කසළ එකතුකරන්නන් වෙත ලබා දීමට නොහැකි නම් එකී කසළ සඳහා සිය නිවෙස් තුළම විසඳුමක් සොයා ගන්නැයි බස්නාහිර පළාත් අපද්‍රව්‍ය කළමනාකරණ අධිකාරිය අධ්‍යක්ෂක නලින් මාන්නප්පෙරුම මහතා අද (22) පැවසීය.

බස්නාහිර පළාත් ප්‍රධාන අමාත්‍යංශයේ ලේකම්වරිය වන ඒ.ඒ.එස් සදිකා මහත්මිය,බස්නාහිර පළාත් කොමසාරිස් ඒ.ඩී.අයි.පී ප්‍රසන්න,බස්නාහිර පළාත් අපද්‍රව්‍ය කළමනාකරණ අධිකාරිය සභාපති සමිල හේරත් සහ තමා ඇතුළු නිලධාරීන් ගනු ලැබූ තීරණයකට අනුව මෙම ක්‍රමවේදය අද සිට ක්‍රියාත්මක කරන බවද ඒ මහතා පැවසීය.

නිවෙස් වලින් බැහැරලන මිශ්‍ර කසළ 100% වෙන්කර නොමැති නම් එය බාර නොගන්නා ලෙස පළාත් පාලන ආයතන සේවක කණ්ඩායම් වලට දැඩිව උපදෙස් ලබා දී ඇති බවද අධ්‍යක්ෂක වරයා පැවසීය

 කරදියාන කසළ අංගනයේ භුමි ස්ථායිතාව පිළිඹඳ ජාතික ගොඩනැගිලි පර්යේෂණ ආයතනය මගින් 2020 වර්ෂයේ ලබාගත් තත්ව  වාර්තාවට අනුව කරදියාන කසළ මුදා හැරීමේ උපරිම සීමාවට පැමිණ ඇති බව ඒ මහතා පැවසීය.

එහෙයින්  කරදියානට ප්ලාස්ටික් නොදිරන අපද්‍රව්‍ය බැහැරලීම පූර්ණ ලෙස නවතා දමා ඇති බව සඳහන් කරන ඒ මහතා  අනෙකුත් කසළ අංගන ද ආවරණය වන පරිදි සීයට සීයක් කසළ වෙන් කිරීමේ වැඩසටහනක් ආරම්භ කර ඇති බවද පැවසීය.

 පරිසරය පිළිබඳව දැනුමකින් තොර ආදරයකින් තොර ඇතැම් ජනතාව නිවසේදී සිදු කළ හැකි බොහොම සරල ක්‍රියාවලියක් වන ඉඳුල් අපද්‍රව්‍ය සහ දිරන නොදිරන කසළ වෙන්කර පළාත් පාලන ආයතන සඳහා ලබානොදීම හේතුවෙන් මිලියන ගණන් වැය කරමින් බස්නාහිර පළාත් අපද්‍රව්‍ය කළමනාකරණ අධිකාරිය මඟින් ‍ක්‍රියාත්මක කරන ඇතැම් ව්‍යාපෘතිවල නිසි ඵල ලබාගැනීමට නොහැකි තත්ත්වයක් මතුව ඇති බවද ඒ මහතා පැවසීය.

කරදියාන කසළ අංගනය කසළ මුදාහැරීමේ උපරිමයට පැමිණීම හේතුවෙන් එකී කසල අංගනයට පළාත් පාලන ආයතන හතක කසළ බැහැරලීම නවතා ඇති හෙයින් එම කසළ කෙරවලපිටිය ව්‍යාපෘතියට යැවීමට පියවර ගෙන ඇති බව සඳහන් කළ ඒ මහතා එකී පියවර ද මිශ්‍ර කසළ හේතුවෙන් දැඩි අර්බුදකාරී තත්ත්වයකට මඟ පාදා ඇති බවද පැවසීය.