නැගෙනහිර මහ ඇමැති අහමඩ් නසීර් නාවික හමුදාවේ උසස් නිලධරයකුට ත්‍රිකුණාමලය සාම්පූර් මහ විද්‍යාලයේ ත්‍යාග ප්‍රදානෝත්සවයකට එක්ව සිටියදී බැන වැදීමේ සිද්ධිය සම්බන්ධයෙන් කොන්දේසි විරහිතව සමාව ගත යුතු බව මුස්ලිම් කොංග්‍රස් නායක රාවුෆ් හකීම් මහතා ත්‍රීකුණාමලයේ කින්නියාවේ පැවති රැස්වීමක දී පැවසීය.

“මහ ඇමැති අහමඩ් නසීර් ඔහුගේ ඉවසීම පාලනය කරගත යුතුව තිබුණා. මා කියන්නේ ඔහු ප්‍රසිද්ධීයේ සමාව ඉල්ලා සිටිය යුතු බවයි. මෙවැනි ක්‍රියා වලින් ජාතිවාදීන්ට හා අවස්ථාවාදීන්ට අවස්ථාව සලසා දිය යුතු නැහැ. පරාජිත දේශපාලන බලවේග වලට යළි නගී සිටීමට ඉඩ නොතැබිය යුතුයි. මුස්ලිම් ජනතාව ඉවසන්න ඕනෑ. ඉවසීම ඇත්නම් දිගු ගමනක් යා හැකී.” යැයි ද හකීම් මහතා වැඩිදුරටත් පැවසීය