(නිමන්ති රණසිංහ)

මුහුණු පොතෙන් හදුනාගත් මාතර ප්‍රදේශයේ කාන්තාවකට මුදල් වංචා කළ විදේශීය ජාතිකයෙක් පොලිස් පරිගණක අපරාධ කොට්ඨාශය විසින් නුගේගොඩ දී අත්අඩංගුවට ගනු ලැබීය.

පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මහතා සඳහන් කළේ විදේශීය රටක ඩොලර් පාර්සලයක් ලැබී තිබෙන බවට පවසා පැමිණිලිකාරිය ගෙන් රුපියල් එක් ලක්ෂ විසිනම දාහසක මුදලක් වංචනීකව ලබාගෙන ඇත්තේ ලෙසතෝ ජාතික විසි තුන් හැවිරිදි තරුණයකු බවය.

මෙම සැකකරු ගල්කිස්ස ප්‍රදේශයේ රෙදිපිළි ව්‍යාපාරිකයකු ලෙසින් මුහුණු පොත ඔස්සේ පෙනී සිට ඇතැයිද පොලිස් මාධ්‍ය ප්‍රකාශකවරයා සඳහන් කළේය .

නොදන්නා පුද්ගලයන් සමඟ සමාජ ජාල මගින් ගණුදෙනු කිරීමේදී විවිධ ආකර්ෂණීය යෝජනා ලැබිය හැකි බවත් ඒ පිළිබඳව බුද්ධිමත්ව කටයුතු නොකළහොත් රැවටීම්වලට හසුවිය හැකි බවත් පොලිස් මාධ්‍ය ප්‍රකාශකවරයා පැවසීය.