යුධ සමයේ  රට දැය වෙනුවෙන් තම ජීවිතය කැප කර ආබාධිත තත්වයට පත් වු අභීත රණවිරුවන් වෙනුවෙන් යක්කල රණවිරු ඇපරල් ඒකකයේ ඉදි කළ ශ්‍රී ලංකා යුධ හමුදාවේ  ප්‍රථම පරිසර හිතකාමී නිවහන   යුධ හමුදාපති ලුතිනන් ජනරාල් දයා රත්නායක මහතා  විසින්  විවෘත කළේය.

එම අවස්ථාවේ මහා සංඝරත්නය පිරිත් සච්ඡායන කළ අතර යුධ හමුදා මාණ්ඩලික ප්‍රධානී, රණවිරු ඇපරල්ස් කළමනාකරණ මණ්ඩලයේ සභාපති   මේජර් ජනාරල් ප්‍රසාද් සමරසිංහ,  පුනරුත්තාපන අධ්‍යක්ෂක මේජර් ජනරාල් ඉසෙඩ්. වික්‍රමසිංහ, රණවිරු ඇපරල් සේනා විධායක  බ්‍රිගේඩියර් ඊ.එම්.ජී වික්‍රමනායක යන  මහත්වරුද මෙම අවස්ථාවට එක්ව සිටියහ.

ඉන් අනතුරුව යුධ හමුදාපතිවරයා  නිලධාරී නිවස්නයේ මහල් සියල්ලටම ගොස් එහි ඇති පහසුකම් පිළිබඳ සොයා බැලූ අතර  රණවිරු ඇපරල් ආයතනයෙ ඉදිවන පිහිනුම් තටාකය ඇතුළු ස්ථාන රැසක නිරීක්ෂණ චාරිකාවකටද එක් විය.

රුපියල් තුන්කෝටි හැත්තෑ ලක්ෂයක  වියදමින් හරිත සංකල්පයට ඉදිකරන ලද මෙම නව තෙමහල් ගොඩනැගිල්ල ආබාධිත රණවිරුවන්ට සියලූ පහසුකම් වලින් සපිරිව  සුඛෝපභෝගී කාමර 14 කින් සමන්විතය.

වරලත් වාස්තු විද්‍යාංඥ,  මොරටුව විශ්ව විද්‍යාලයේ ජ්‍යෙෂ්ඨ කථීකාචාර්ය ආචාර්ය උපේන්ද්‍ර රාජපක්ෂ  සහ කපිතාන් අමිල ගුණවර්ධන යන මහත්වරුන් විසින් මෙහි ගෘහ නිර්මාණය සකසා ඇත්තේ හරිත සංකල්පය අනුව වඩාත් පරිසර හිතකාමී ලෙසය. පිටත ඇති උෂ්ණත්වය නිවස්නය ඇතුලතට නොඑන පරිදි මෙය නිර්මාණය කර ඇති නිසා  නිවස්නය   ඇතුලත සිසිල්ය.

මෙහිදී යුධ හමුදාපතිවරයා විසින් මෙය නිර්මාණය කළ ආචාර්ය උපේන්ද්‍ර රාජපක්ෂ මහතාට ඔහු මෙම නිවස්නය හරිත සංකල්පයට අනුව ඉදිකිරීමට කළ කැපවීම සහ මෙහෙය   වෙනුවෙන් විශේෂ සමරු තිලිණයක්ද පුද කළේය.

ශ්‍රී ලංකාවේ උතුරු නැගෙනහිර පැවති යුධමය තත්වය හේතුවෙන් ආබාධිත තත්වයට පත් වු සෙබළුන් පුනරුත්තාපනය කර වෘත්තීය පුහුණුවක් ලබා දීමේ අරමුණින් යුතුව යක්කල රණවිරු ඇපරල්ස් ආයතනය 1996 වර්ෂයේ  ආරම්භ කර ඇත.

මෙහි ශ්‍රී ලංකා  යුධ ලංකා යුධ හමුදාවට අවශ්‍ය සියලූ නිල ඇඳුම් නිෂ්පාදනය කරනු ලබන්නේ  උතුරු නැගෙනහිර යුද්ධයෙන් විවිධ ආබාදයන්ට ගොදුරුවු ආබාධිත රණවිරුවන් විසිනි.

යක්කල ප්‍රදේශයේ දානපතියෙකු වු ඩේවිඩි මෙරික් පීරිස් මහතා විසින් මේ සඳහා ඉඩම් අක්කර 05 ක ප්‍රමාණයක් නොමිලේ පරිත්‍යාග කළ අතර තවත් අක්කර 05 ක ප්‍රමාණයක් සුළු මුදලකට ලබා දී ඇත.
විවිධ ශාරීරික ආබාධයන්ට ගොදුරු වු සොල්දාදුවන් 60 දෙනෙකුගෙන් දායකත්වයෙන්  මහන මැෂින් 25 ක් උපයෝගී කරගෙන  1997 අගෝස්තු 23  ප්‍රථමවරට  මෙහි ඇඳුම් නිෂ්පාදන කටයුතු ආරම්භ කර ඇත.

 මෙහි නිෂ්පාදනයට අවශ්‍ය මිනිස් ශ්‍රමය ආබාධිත සොල්දාදුවන්ගෙන් තෝරාගෙන ඔවුන්ට ඇගලූම් ක්ෂේත්‍රය පිළිබඳ පුහුණුව ලබා දී බඳවාගෙන ඇත. මේ වන විට මෙහි මැෂින් 269 ක් ක්‍රියාකරන අතර  නිලධාරීන් 17 ක්, සෙසු නිළයෝ 849 ක් සේවය කරති.

මේ වන විට මෙහි  ඇගලූම් ක්ෂේත්‍රයට ආවේනික නවීන තාක්ෂණයෙන් යුතු නවීන ක්‍රමෝපායන් උපයෝගී කරගනිමින් ගුණාත්මක භාවයෙන්  යුතු උසස් නිළ ඇඳුම් නිෂ්පාදනය කරන අතර එය දිනකට නිල ඇඳුම් 1080 කි.

එය සමස්ථ යුධ හමුදාවේ වාර්ෂික නිල ඇඳුම් අවශ්‍යතාවයෙන්  සියයට 65 කි. මේ වන විට රණවිරු ඇපරල් ආයතනයේ වත්කම් වල මුලූ වටිනාකම රුපියල් මිලියන 1257 කි

.මෙම අවස්ථාවට යුුධ හමුදාපති ලූතිනන් ජනරාල් දයා රත්නායක, මාණ්ඩලික ප්‍රධානී මේජර් ජනරාල් ප්‍රසාද් සමරසිංහ, පුනරත්ථාපන අධ්‍යක්ෂක මේජර් ජනරාල් ඉසෙඩ්. වික්‍රමරත්න, රණවිරු ඇපරල් ආයතනයේ සේනා විධායක බ්‍රිගේඩියර් ඊ.එම්.ජී වික්‍රමනායක, විශ්‍රාමික යුධ හමුදාපතිවරු  ඇතුඵ යුධ හමුදා ජ්‍යේෂ්ඨ  නිලධාරීහු රැසක්   සහභාගී වුහ.