වෘත්තිය මට්ටමේ මෝස්තර නිරූපිකාවක ලෙස කටයුතු කරන චන්දි අනුපමා, මේ වනවිට රංගනයටද පිවිස සිටින්නීය. ටෙලිනාට්‍යය මෙන්ම, ගීත රූප රචනා කිහිපයකින්ද ප්‍රේක්ෂක ඔබ හමුවන එන චන්දි ඉදිරියේදී රංගන ශිල්පිනියක් ලෙස වැඩි දායකත්වයක් ලබාදීමට අපේක්ෂාවෙන් සිටියි. මෙවර 'සාරවිට' තරු කතාබහට එක්වන චන්දි අනුපමා සිය කලා කටයුතු පිළිබඳව මෙසේ අපි සමගින් අදහස් බෙදාහදා ගත්තෙමු.

චන්දි ක්ෂේත්‍රයට සම්බන්ධ වෙන්නේ?

2003 අවුරුද්දේ. 'සන්ඩේ ඔබ්සවර්' පුවත්පත විසින් සංවිධානය කළ 'මිස් ලංකා' පැජන්ට් එකට සම්බන්ධ වීමත් සමග තමයි නිරූපණ ක්ෂේත්‍රයට සම්බන්ධ වුණේ.

ඔබ සහභාගී වුණ මේ 'මිස් ලංකා' තරගය ගැන කිව්වොත්?

මාත් එක්ක තරගකාරියන් 30 දෙනෙක් විතර මේ තරගයට ඉදිරිපත් වෙලා හිටියා. තරගයේ අන්තිම තරගකාරියන් 10 දෙනා අතරට එන්න මට පුළුවන්කම ලැබුණා.

ක්ෂේත්‍රයට සම්බන්ධ වුණේ?

2003 අවුරුද්දේ ක්ෂේත්‍රයට සම්බන්ධ වුණත් වසර කිහිපයක් ගෙවෙද්දි මම වසර දෙකකට විදෙස් ගත වුණා. ඊට පස්සෙ නැවතත් නිරූපණ ක්ෂේත්‍රයට එකතු වුණේ 2007 අවුරුද්දේ. එතැන් සිට මේ දක්වා නොකඩවා මම නිරූපණ ශිල්පිනියක විදිහට කටයුතු කරනවා.

මේ ගෙවුණු කාලය තුළදී රංගනයට පැත්තටත් ඔබ යොමු වුණා?

ටෙලිනාට්‍යය, වෙළෙඳ දැන්වීම් හා ගීත රූප රචනා බොහොමයකට දැනට දායක වෙලා තියෙනවා.

ඒ නිර්මාණ ගැන සඳහනක් කළොත්?

අතුල අධිකාරි ගයන 'මගේ කියා ඈත් වෙලා', කසුන් චාමරගේ 'ඔබ නෑනේ හීනේ', ක්‍රිශාන්ත එරන්දකගේ 'ප්‍රේමයෙන් සඳා', ජුඩ් රොගැන්ස්ගේ 'දුක නෙතේ පුරවලා' ඇතුළු ගීත රූප රචනා බොහොමයකට දායක වෙලා තියෙනවා. ඒ වගේම තව ඉදිරියට එන්නත් කිහිපයක් තියෙනවා. 'විවා' දමිළ, 'මොබිටෙල්' ඇතුළු වෙළෙඳ දැන්වීම් කිහිපයකටම දායක වෙලා තියෙනවා. ඊට අමතරව චාමර ජිනරාජ්ගේ 'ඇසිඩ්' කියන ටෙලිනාට්‍යයට සම්බන්ධ වුණා. ඉදිරියේදී ඔහුම අධ්‍යක්ෂණය කරන තවත් ටෙලි නාට්‍යයකට දායක වෙලා තියෙනවා. ඒ ටෙලිනාට්‍යයේ කතාව වෙනස්ම එකක්.

නිරූපිකාවක විදිහටද, රංගන ශිල්පිනියක් විදිහටද ඉදිරියේදී වැඩි කාලයක් වැය කරන්න අදහස් කරන්නේ?

රංගන ශිල්පිනියක් විදිහට. නිරූපිකාවක විදිහට දැනට අවුරුදු 10ක් විතර වැඩ කළා. මට අවශ්‍යයි එතැනින් එහාට යන්න. ඒනිසා ඉදිරියේදී රංගන ශිල්පිනියක විදිහට වැඩිපුර වැඩ කරන්න කැමතියි.

නිරූපණ ක්ෂේත්‍රය ගැන මොකද හිතෙන්නේ?

කියන්න තරම් ලොකු දෙයක් නැහැ. මොකද ලංකාවේ මෝස්තර නිරූපිකාවගේ ටැලෙන්ට් එක කියන්නෙ සම සුදු වෙන්න ඕනා. එහෙම නැත්නම් ඇහට කනට පේන හොඳ ඇඟක් තියෙන්න ඕනා කියන එකයි. මම ක්ෂේත්‍රයට ඇවිල්ලා දැන් ගොඩ කාලයක් වෙනවා. ගොඩක් පරණ නිරූපිකාවන් මගේ මිතුරියන්. ඒ අතර ගොඩක් අය ඉන්නවා හොඳ ටැලෙන්ට් එකක් තියන අය.

උදව් කළ අය?

පරාක්‍රම දිමිත්‍රි, චාමර ජිනරංජන, රොහාන් අමරකෝන්, %හරි ක්‍රියේෂන්^ එකේ ළහිරු මුදලිගේ සහ එරන්ද අයියා ගොඩක් මට උදව් කරලා තියෙනවා. ඒ වගේම ගෙදර අයත් මට පුළුවන් උපරිමට සහාය ලබා දෙනවා. වචනයකින් හරි උදව් කළ නම් කියූ නොකියු ක්ෂේත්‍රයේ හැම දෙනාවත් මේ වෙලාවේදී මතක් කරනවා.

බුද්ධික සේනාධීර / ඡායාරූප - කවීත් මිලින්ද