ලාංකේය සිනමාවේ "සිහින කුමරා" ලෙස වර්තමානයේ බොහෝ දෙනා හඳුන රොෂාන් රණවන පිළිබඳව හඳුන්වාදීමට අවශ්‍ය නැත. "හිරි පොද වැස්ස" චිත්‍රපටය ඇතුළු ජනප්‍රිය චිත්‍රපට කිහිපයක් තුළින් රසිකයන් හමුවූ ඔහු ඉදිරියේදී තවත් චිත්‍රපට බොහොමයකින් හමුවීමට නියමිතයි. චිත්‍රපටවලට පමණක් සීමා නොවූ ඔහු මේ වනවිට ටෙලිනාට්‍යය රැසකටද සිය රංගන දායකත්වය ලබාදී ඇති අතර, ඔහු පසුගිය දිනවල වඩාත් ජනප්‍රිය වී තිබුණේ දෙරණ "ස්ටාර්සිටි" රියලිටි වැඩසටහන හරහායි.

රොෂාන්ගේ කලා කටයුතු මොනවද?

හර්ෂ උඩකන්දගේ "උලත් එකයි පිලත් එකයි" චිත්‍රපටය තවත් නොබෝ දිනකින් ප්‍රදර්ශනය වීමට නියමිතයි. ඊට අමතරව නලින් රාජපක්ෂගේ "රේන්බෝ" චිත්‍රපටයත් ඉදිරියේදී ප්‍රදර්ශනය වෙන්න තියෙනවා. පළමු වතාවට ලාංකේය සිනමාවේ දුෂ්ටයා වෙන්නත් මට අවස්ථාව ලැබිලා තියෙනවා. ඒ චිත්‍රපටය අධ්‍යක්ෂණය කරන්නෙත් "උලත් එකයි පිලත් එකයි" අධ්‍යක්ෂණය කළ හර්ෂ උඩකන්ද. චිත්‍රපටයේ රූපගත කිරීම් කටයුතු සැප්තැම්බර් මාසයේ ඉඳලා පටන් ගන්නවා.

"සඳ සේයා" ටෙලි නාට්‍යය හරහා රොෂන් නැවතත් පුංචි තිරේ අපි දකිනවා?

ඔව්. ස්වාධීන රූපවාහිනි නාළිකාවේ විකාශය වුණ "රන් සමනල්ලු" ටෙලි නාට්‍යයට පස්සේ තමයි මම "සඳ සේයා" නාට්‍යයට එකතු වුණේ. හැබැයි මේ නාට්‍යය දෙක අතර ලොකු කාල පරතරයක් තිබුණා. කාලයකට පස්සෙ ටෙලි නාට්‍යයකින් ප්‍රේක්ෂකයන් හමු වුණ නිසා "සඳ සේයා" ටෙලි නාට්‍යයෙ කළ චරිතයට මට ඉහළ රසික ප්‍රතිචාර ලැබුණා.

කාලයක් අරගෙන ටෙලි නාට්‍යයවලට සම්බන්ධ වීමේ වාසියක් තියෙනවා කියලා ඔබ හිතනවද?

ඔව්. ටෙලි නාට්‍යයවලට වෙන්වුණ පිරිසක් ඉන්නවා. මේ අය තමයි නිතරම ප්‍රේක්ෂකයන්ගේ මතකයෙ ඉන්නෙ. මාව බොහෝ විට දකින්න ලැබෙන්නෙ සිනමාවෙන්. නිතරම සිනමාවෙන් දැකලා පුංචි තිරේ ටෙලි නාට්‍යයක් හරහා ඔවුන් අතරට යන කොට ඒකේ ලොකු වටිනාකමක් තියෙනවා කියලා මම හිතනවා.

රියලිටි තරගවලදී අපි ඔබව රංගන ශිල්පියෙකුට අමතරව ගායකයෙකු, නර්තන ශිල්පියෙකු විදිහටත් දකිනවා?

ඔව්. දෙරණ "සිටි ස්ටාර්" වැඩසටහන තුළ මම රංගන ශිල්පියෙකු, නර්තන ශිල්පියෙකුට වඩා ගායකයෙකු ලෙස ඉස්මතු වුණා. බොහෝ අවස්ථාවලදී මම කරපු ගීත ගායනාවලට විනිසුරුවන්ගේ පවා ඉහළ ප්‍රතිචාර ලැබුණා. රංගනයට අමතරව මට තියෙන අමතර හැකියාවක් තමයි ගායන හැකියාව. දැනට මම ගීත කිහිපයක් ගායනා කරලා තියෙනවා. විදෙස් සංචාර සඳහා ආරාධනා ලැබුණාම මම ගීත ගායනා කරනවා.

රියලිටි තරගවලට එකතු වීම ඔබේ වටිනාකමට හානියක්ද?

නැහැ. මම එහෙම දෙයක් දකින්නේ නැහැ. මොකද රියලිටි තරග කියන්නෙත් එක්තරා විදිහේ කලා කටයුත්තක්. මේක තරගයක් විදිහට පැවැත්වුණත් එහි අපි ඉදිරිපත් කළ යුත්තේ අපේ රංගන හැකියාව. දෙරණ "ස්ටාර් සිටි" කියන්නේ මගේ දෙවැනි රියලිටි තරගය. මීට පෙරත් මා වතාවක් රියලිටි තරගයක් සඳහා ඉදිරිපත් වුණා.

බුද්ධික සේනාධීර