දුන් පොරොන්දු මෙතෙක් ඉටු නොවීම පිළිබඳව තමන් සිටින්නේ කනස්සල්ලෙන් හා කලකිරීමෙන් බව පිවිතුරු හෙටත් සඳහා ජාතික සභාවේ සභාපති පාර්ලිමේන්තු මන්ත්‍රී අතුරලියේ රතන හිමියෝ පැවසූහ.

ජනතාවට දුන් පොරොන්දු රජය ලවා ඉටු කරවාගැනීමට මහජන මතයක් ඇති කිරීමට කටයුතු කරන බවත් පොරොන්දුවූ පරිදි ජාතික රජයක් පිහිටුවා ව්‍යවස්ථා සංශෝධනයක් ඇතුළු කටයුතු ජනපතිවරයා කළ යුතු බවද රතන හිමියෝ කීහ.

රනිල් වික්‍රමසිංහ මහතාට අගමැතිකම ලබාදීම මිස එක්සත් ජාතික පක්ෂ ආණ්ඩුවක් පිහිටුවන බවට පොරොන්දුවක්දී නොමැති බැවින් ජාතික ආණ්ඩුවක් පිහිටවිම ගැන අගමැතිවරයා විරෝධය පෑම අසාධාරණ බවද උන්වහන්සේ කීහ.

රාජගිරිය ගෝතමී පාරේ සදහම් සෙවණ බෞද්ධ මධ්‍යස්ථානයේදී අද (3) පැවැති මාධ්‍ය හමුවකදී රතන හිමියෝ මේ බව පැවසූහ.