රන්දීර් විතාන බොහෝ දෙනා හඳුනා ගනු ලැබුවේ රැප් ගායකයෙකු ලෙසයි. නමුත් ඔහු විසින් එළිදැක්වූ "නාමල් මිටක්" ගීතයෙන් පසුව ඔහු ඒක පුද්ගල ගායකයෙකු ලෙසද ජනප්‍රියත්වට පත්විය. මේ දිනවල නැවතත් ඔහු පිළිබඳව කතාබහට ලක් වන්නේ ඔහු විසින් පසුගිය දිනෙක එළිදැක්වූ අමුතු ආකාරයේ ගීතය නිසයි. ඒ "සිහිවටන" නම් ගීතය පිළිබඳව වැඩිදුර තොරතුරු දැන ගැනීම සඳහා "සාරවිට" සඳහා අප රන්දීර්ව සම්බන්ධ කරනු ලැබුවා. මේ ඔහුගේ අදහසයි.

"මේ ගීතය ලිව්වේ මනුරංග විජේසේකරයි. මෙහි තනුව දිලුම් තේජනගෙයි. මෙම වීඩියෝවේ අධ්‍යක්ෂක වෙන්නේ මුවිඳු බිනෝයි විසිනි. මේ සිංදුව ගැන කිව්වොත්, අවුරුදු එකහාමාරකට කලින් මනුරංග මට ගෙනාපු එකක්. ඇත්තටම කිව්වොත් ඒකේ Dummy එකක Voice කරලා ඔහොම්ම තිබ්බා. ඉතිං ඒකට මුකුත් කරන්න වුණේ නැහැ. මම මේ අවුරුද්දේ වෙන සිංදුවක් දාන්න හිටියා. එක පාර අර සිංදුව දාන්න ඉඳලා ඊට පස්සේ මතක් වුණා අර මුලින් කරපු සිංදුව දැම්මොත් හොඳයි කියලා. ඊට පස්සේ තමයි දාන්න හිටපු එක නවත්තලා "සිහිවටන" සිංදුව දැම්මේ."

"මේ විශේෂයෙන්ම කියන්න ඕනේ දේ තමයි වීඩියෝව පිළිබඳව. මේ මුලු මියුසික් වීඩියෝවම අරන් තියෙන්නේ එක ෂොට් එකකින්. එකේ මාත් එක්ක රංගනයෙන් දායක වෙනවා යුරේනි නොෂිකා. මම හිතන්නේ මම දන්න තරමින් ලංකාවේ මේ වගේ ගීතයක් බිහිවුණේ නැහැ. ඒක රූගත කරනවා කියන්නෙත් සෑහෙන අමාරු කාරණයක් වුණා. අපි තනි ෂොට් එකකින් කරනවා කියන්නේ Cutsවලට යන්න බැහැ. අපිට ඔය Frame එක ඇතුළේ කර Action එක අපිට ආයේ පාරක් ගන්න බැහැ. සිංදුව විනාඩි තුනහමාරක්නම්, එක Action එකකින් මේ විනාඩි තුනහමාර ඇතුළත් කරන රඟපෑම පිළිබඳව 100% දැනගන්න ඕනා. මොකද වරදින්නත් ඉඩක් නැහැ. ඉතිං මායි, යුරේනියි දොළොස් පාරක් විතර පුරුදු පුහුණු වීම් කරලා තමයි Take එකකට ගියේ. මෙහි හොඳම සිදුවීම තමයි මේ වීඩියෝව බලපු ගොඩක් කට්ටිය අහනවා. කාර් එකේ Screen එක ඇත්තටම කුඩු කළාද කියලා. නැත්නම් ඒ සඳහා Special Effect එකක්ද කියලා. ඇත්තම කාරණාව තමයි. Screen එකක් කැඩුවා. අපිට එක windscreen එකක් විතරයි තිබුණේ. ඉතිං අපි එක Shoot කරද්දි ඒක කැඩුවේ වරදින්න එපා කියන හැඟීමත් එක්කයි."

ඩිලාන් ක්‍රිෂාන්ත