සංවර්ධන (විශේෂ විධිවිධාන) පනත් කෙටුම්පත  සංශෝධනය නොකරන්නේනම් ඊට ශ්‍රී ලංකා නිදහස් පක්ෂයේ සහයෝගය ලබා නොදෙන බව ශ්‍රී ලංකා නිදහස් පක්ෂයේ මාධ්‍ය ප්‍රකාශක රාජ්‍ය ඇමැති ඩිලාන් පෙරේරා මහතා පැවසීය.

මහින්ද රාජපක්ෂ මහතාගේ කාලයේ මේ පනත නොතිබුණත් සුපිරි ඇමැතිවරුන් සිටි බවත්, නැවතත් සුපිරි ඇමැතිවරුන් බිහි කිරීමට ඉඩ නොදෙන බවත් පෙරේරා මහතා සඳහන් කළේය.

‘බලය තවදුරටත් බෙදිය යුතුයි කියා කතා කරන ගමන් බලය ගන්නයි හදන්නේ. බලය බෙදන ගමන් හැන්දෙන් ඔළුවට ගහනවා වගේ අදහසක් තමයි මෙයින් එන්නේ.‘ යැයි ද ඇමැතිවරයා කීවේය.

ශ්‍රී ලංකා නිදහස් පක්ෂය මේ වසරේ පවත්වන අවසන් මාධ්‍ය හමුවට එක්වෙමින් ඔහු එලෙස කීවේය.

ශ්‍රී ලංකා නිදහස් පක්ෂය සහ එක්සත් ජාතික පක්ෂය වසර දෙකකට අත්සන් කළ ගිවිසුම ලබන වසරේ අවසන් වන බවත්, එබැවින් 2017 වසර ශ්‍රී ලංකා නිදහස් පක්ෂයට මෙන්ම දේශපාලන ලෝකයටද වැදගත්   වනු ඇති බවත් ඇමැතිවරයා සඳහන් කළේය.

ශ්‍රී ලංකා නිදහස් පක්ෂ මධ්‍යම කාරක සභාව අනුමැතිය දී ඇත්තේ වසර දෙකක් සම්මුතිවාදීව කටයුතු කිරීමට බව ද, ඉදිරි වසර තුනත් සම්මුතිවාදීව යන බවට පක්ෂ ලේකම්වරයා කීවේ ඔහුගේ පෞද්ගලික අදහසක් බව ද, සම්මුතිවාදී ආණ්ඩුව ඉදිරියට යනවාද නැද්ද යන්න තීරණය කරන්නේ ශ්‍රීලනිප මධ්‍යම කාරක සභාවේදී බව ද ඩිලාන් පෙරේරා මහතා කීවේය.