මෙවර 'සාරවිට' තරු කතාබහට අපි සම්බන්ධ කරගනු ලබන්නේ  මෝස්තර නිරූපිකාවක වූ තක්ෂිලා කුමාරි සමගය. මීට වසර කිහිපයකට පෙර නිරූපණ ක්ෂේත්‍රයට පිවිස පසුව රංගන ශිල්පිනියක ලෙසද කටයුතු කළ ඇය මේ වනවිට කලා ක්ෂේත්‍රයෙන් තාවකාලිව ඈත්ව සිටියි. ඉඩලැබෙන පරිදි යළිත් කලා කටයුතු සඳහා එක්වීමට සූදානමින් සිටින තක්ෂිලා සාරවිට සමග මෙසේ දොඩමලු වූවා.

තක්ෂිලා නිරූපිකාවක් වුණේ?

2009 වසරේ පැවති 'සිංහ' කුමරිය වීමත් සමග තමයි නිරූපිකාවක් විදිහට ක්ෂේත්‍රයට සම්බන්ධ වුණේ.

නිරූපිකාවක් විදිහට දැන් ඔබ කටයුතු කරන්නෙ නැද්ද?

නිරූපණ ක්ෂේත්‍රයෙන් ඉවත් වෙලා නැහැ. ඒත්, මම නිරූපිකාවක් විදිහට ක්ෂේත්‍රයට ආපු මුල් කාලයේදී වැඩ ගොඩක් කළා. ඒත්, දැන් එහෙම වැඩ කරන්නේ නැහැ. ඉඩ ලැබෙන පරිදි මම නිරූපණ වැඩවලට සම්බන්ධ වෙනවා.

ඉඩ ලැබෙන පරිදි කිව්වේ?

දැනට මම ව්‍යාපාරයක් පවත්වාගෙන යනවා. ඒකෙන් කෙරෙන්නේ ටෙලි නාට්‍ය නිෂ්පාදනය කරන එක. ඊට අමතරව රෙදිපිළි සම්බන්ධ ව්‍යාපාරයකට යොමු වෙලා ඉන්නවා. ඉතින් මේ වැඩත් එක්ක තියෙන කාර්යබහුලත්වයත් එක්ක මට කලා වැඩවලට සම්බන්ධ වෙන්න වෙලාවක් හොයාගන්න අසීරු වෙලා තියෙනවා.

කලා කටයුතුවලින් තාවකාලිව සමුගත්ත එක පාඩුවක්ද?

මම හිතන්නේ නැහැ. අදටත් මාව හඳුනගත්තොත් බොහෝදෙනෙක් ඇවිල්ලා කතා බහ කරනවා. ආයෙත් කලා කටයුතුවලට සම්බන්ධ වෙන්නේ නැද්ද කියලා අහනවා. ඒ වගේ රසික ප්‍රතිචාර ලැබෙනවා. මම කලින් සඳහන් කළා වගේ ව්‍යාපාරික කටයුතු කලා කටයුතුයි පටලව ගෙන වැඩ කරන්න අමාරුයි. ඒ නිසා තමයි මම දැන් එක වෘත්තියක් තෝරගෙන කරන්නේ.

ඔබ ආයතනය හරහා මොනවද දැනට නිෂ්පාදනය කර  තියෙන කලා නිර්මාණ?

'කුබිර හෝරාව'  කියන ටෙලි නාට්‍යය කළා. ඉදිරියේදී නිෂ්පාදනය කරන්න චිත්‍රපට හා  ටෙලි නාට්‍ය කිහිපයක් ලැබී තියෙනවා.

නිරූපිකාවක් වුණ ඔබ කාලයක් රංගන ශිල්පිනියක් විදිහටත් වැඩ කළා නේද?

ඔව්. ස්වර්ණවාහිනි නාලිකාවේ විකාශය වුණ 'අළුපාට හීන' ටෙලි නාට්‍යයේ රඟපෑවා මම. ඊට අමතරව 'තැන්ක්යූ බර්ටි' චිත්‍රපටයේ රඟපෑවා. 'අයි ඈම් ශ්‍රී ලංකා' වේදිකා නාට්‍යයටත් සම්බන්ධ වෙලා මම කාලයක් වැඩ කළා.

කලා කටයුතු වලට සම්බන්ධ වෙන්න කියලා ආරාධනා ලැබෙන්නේ නැද්ද?

නිරූපණ වැඩ වලට වගේම රංගන කටයුතු වලටත් එක සමාන ආරාධනා ලැබෙනවා. ඉදිරියේදී විවේකය ලැබෙන පරිදි මේ වැඩවලට සම්බන්ධ වෙන්න බලාපොරොත්තු වෙනවා.

බුද්ධික සේනාධීර / ඡායාරූප - ඒෂාන් ප්‍රනාන්දු