අද්විතීය ශී‍්‍ර ලාංකික සිනමා අධ්‍යක්ෂ වරයකු සහ සංස්කරණ ශිල්පියකු වූ ජනාධිපති සම්මානලාභී ටයිටස් තොටවත්ත, 82 (ටයි මහත්තයා) සෙනසසුරාදා රාතී‍්‍ර කොළඹ පෞද්ගලික රෝහලක දී දැයෙන් සමුගත්තේය. 1929 අපේ‍්‍රල්17 වැනි දින බොරැල්ලේදී එම්මානුවෙල් ටයිටස් ද සිල්වා නමින් උපත ලද ටයිටස් තොටවත්ත 60 සහ 70 දශකයන්හි දී සිංහල සිනමාවේ ළමා වැඩසටහන් නිෂ්පාදනයේ සහ සංවර්ධනයේ ලා බෙහෙවින් ජනාදරයට පත්විය. කොළඹ ආනන්ද විද්‍යාලයයේ දීප්තිමත් ආදි ශිෂ්‍යයකු වූ තොටවත්ත සහෝදරයන් තිදෙනකුගෙන් සහ සහෝදරියන් දෙදෙනකුගෙන් යුතු පවුලක වැඩිමලා විය. ඔහු කලාව ප‍්‍රගුණ කරන ලද්දේ සුප‍්‍රකට ජේ.ඞී.ඒ.පෙරේරා සහ ස්ටැන්ලි අබේසිංහයන් ගේ මගපෙන්වීමෙනි. පසුව මාතර තාක්ෂණික විද්‍යාලයේ අධ්‍යාපනය ලද්දේය. තොටවත්තයෝ පසුව ආචාර්ය ලෙස්ටර් ජේම්ස් පීරිස් සහ විලී බ්ලේක් විසින් 1956 දී නිෂ්පාදනය කරන ලද රේඛාව චිත‍්‍රපටයේ සංස්කාරකවරයා වූහ. රේඛාව චිත‍්‍රපටයේ ඔහු සංස්කාරක ලෙස ඉටුකරන ලද මෙහෙවර එවකට දකුණු ඉන්දීය සිනමාව කොපි කිරීමෙන් පරිබාහිරව සිංහල සිනමාවේ කඩඉම් සළකුණක් සනිටුහන් කිරීමක් විය. ඉන්පසු 1965 චන්ඩියා, 1969 දී කවුද හරි , 1970 දී තෙවත, 1971 දී හාරලක්ෂය, 1979 හඳයා ළමා චිත‍්‍රපටය ද අධ්‍යක්ෂණය කළ ඔහු බාල තරුණ වැඩිහිටි  සියඑ දෙනාගේ සිත් සතන් දිනා ගැනීමට සමත්වූවේය. හෙළයේ මහා ඉසි කුමාරතුංග මුණිදාසයෙන්ගේ ඇසුරෙන් ලැබූ භාෂා ප‍්‍රාගුණ්‍යය ද තොටවත්තයන්ගේ නිර්මාණ තුලින් නිරන්තරවම දක්නට ලැබිණි. තොටවත්ත හෙළ බස ප‍්‍රචලිත කිරීමේ ලා වැදගත් මෙහෙවරක් කෙළේය. අසූව සහ අනූව දශකයන්හි දී ඉංගී‍්‍රසි කාටූන් චිත‍්‍රපටවූ  ‘‘බග්ස් බනී’’ ‘‘හා හා හරි හාවා’’ ලෙසටත්  ‘‘ඩොක්ටර් ඩූ ලිට්ල්’’ ‘‘දොස්තර හොඳ හිත’’ ලෙසටත් සිංහලයට හ`ඩකවා ඉදිරිපත් කිරීමෙන් සිංහල රූපවාහිනී ප්‍රෙක්ෂකයන් අතර සදා නොමියෙන මතක සටහනක් තබන්නට හෙතෙම සමත්විය. රූපවාහිනී ක්ෂේත‍්‍රයේ හ`ඩකැවීමේ වැඩසටහන් ජනපි‍්‍රයකිරීමට තොටවත්තයන් දැක්වූ දායකත්වය සදා අමරණීයය. ශී‍්‍ර ලාංකික ඉතිහාසයේ ප‍්‍රථම ජාතික මාධ්‍ය සම්මාන උළෙලේදී ශී‍්‍ර ලංකාවේ රූපවාහිනී මාධ්‍යයට දැක්වූ දායකත්වය වෙනුවෙන් ඔහුට ස්වර්ණ සම්මාන හිමිවිය . තොටවත්ත මහතාගේ දේහය රාජගිරිය නාවල පාරේ අංක 6/292 දරන නිවසෙහි තැන්පත් කර ඇත. අවමඟුල ලබන බදාදා (10) බොරැල්ලේ කනත්තේදී පස්වරු 4 ට සිදු කැරේ. එදින පෙරවරු දහයේ සිට පස්වරු තුන දක්වා කොළඹ ජාතික කලාභවනෙහි දේහය තැන්පත් කැරෙයි. ඔහු විසින් සංස්කරණය කරන ලද චිත‍්‍රපට 1956 රේඛාව 1960 සංදේශය 1962 රන් මුතු දූව 1964 ගැටවරයෝ 1964 ධීවරයෝ 1965 පරසතුමල් 1966 සාරවිට 1967 සොරුන්ගෙත් සොරු 1967 වසන්ති 1968 පුංචි  බබා 1969 බඩුත් එක්ක හොරු 1969 හන්තානයේ කතාව 1975 සිකුරුලියා ඔහු විසින් තිර රචනය, අධ්‍යක්ෂණය හා සංස්කරණය කරන ලද චිත‍්‍රපට 1965 චණ්ඩියා 1970 තෙවත ඔහු විසින් අධ්‍යක්ෂණය හා සංස්කරණය කරන ලද චිත‍්‍රපට 1969 කවුද හරි 1971 හාරලක්ෂය 1974 සිහසුන 1974 සාගරිකා 1976 මංගලා 1977 මරුවා සමග වාසේ 1979 හඳයා