හීලෑ අලින්ගේ තොරතුරු ඇතුළත් ලේඛනය වෙනස් කළැයි කියන ලිපිකාරිණිය වන එච්.ජී.ප්‍රියංකා සංජීව රහස් පොලිසියෙන් අත් අඩංගුවට ගත් බව රජයේ නීතිඥ දිලීප පීරිස් මහතා කොළඹ ප්‍රධාන මහේස්ත්‍රාත් ගිහාන් පිලපිටිය මහතා හමුවේ කියා සිටියේය.

ඇය විසින් එම පොතේ ඇතැම් සටහන් වෙනස් කරන ලදැයිද ඔහු කීවේය. පැටවකු නොමැතිව පැටවකු සිටින බවට ඇය සටහන් තබා ඇති බවත් එසේ කර ඇත්තේ අනාගතයේදී අල්ලා ගන්නා පැටවුන්ට නීත්‍යනුකූල භාවයක් ලබාදීමටත් යැයි ඔහු කීවේය.

අලි ඇතුන් වෙනුවෙන් බලපත්‍ර හා ලියකියවිලි ලබා ගැනීමට පළවැනි සැකකරු දෙපාර්තමේන්තුවේ ඇතැම් අයට රුපියල් හාර ලක්ෂයේ සිට දස ලක්ෂය දක්වා අල්ලස් දී ඇතැයිද ඔහු කීවේය. රහස් පොලිසිය වනජීවී අධ්‍යක්ෂකගේ කටඋත්තරය ලියාගෙන ඇතැයිද ඒ අනුව මහරගම විපස්සනාරාමය එම සිද්ධියට හවුල් බවට ඍජු හා සෙසු සාක්කි ඇතැයිද ඔහු කීවේය.

වනජීවී දෙපාර්තමේන්තුවේ සහායද පශු වෛද්‍ය සහායද ලබාගෙන අලි පොතේ ඇති සටහන් 55 ක් සෝදිසි කර බලන ලෙස වනජීවී අධ්‍යක්ෂකට නියෝග කරන්නැයිද ඔහු ඉල්ලා සිටියේය.

රජයේ ජ්‍යෙෂ්ඨ නීතිඥයා අධිකරණය හමුවේ කියා සිටියේ පැටවා අල්ලා ගැනීමට පෙර මව් ඇතින්න සිහි නැති කිරීම සඳහා බෙහෙත් විදින බවයි. යළි සිහිය ගැන්වීම සඳහා දෙවැනි එන්නත කිසිවිටකත් මව් ඇතින්නට නොදෙන බවත් ඒ නිසාම ඇය මිය යන බවත් වැඩිපුරම අලි ඇතුන් මැරෙනුයේ මේ සිද්ධිය නිසා බවත් ඔහු කියා සිටියේය.

අලි පැටවුන් සොරකම් කළැයි කියන සිද්ධියේ පළමුවැනි සැකකාර අලි රොෂාන්ගේ කතරගම හෝටලයට ගිය නමුත් එහි භාරකරු නොසිටි නිසා පිරික්සීමට නොහැකිවූ බවද වහලේ ඇස්බැස්ටස් තහඩු ඉවත් කර කිසිවකු එහි ඇතුළුවී නඩුවේ වැදගත් සාක්කි අතුරුදන් කර ඇති බව පෙනේ යැයිද ඔහු කීවේය.

DSC_4864 RDS_3972 RDS_3976 RDS_3991 RDS_8971