(පුෂ්පකුමාර මල්ලවආරච්චි සහ ආනන්ද ජයකොඩි)

පොලිස් අණ නොතකා පලාගිය යතුරුපැදිකරුවකු අත්අඩංගුවට ගැනීමට ගිය අවස්ථාවේ පොලිසියේ පිරිසක් යතුරුපැදිකරුගේ පහරදීමට ලක්ව එක් පොලිස් නිලධාරියකු අද (27) රෝහල්ගත කර ඇති ඇති අතර පලා යාමට තැත් කළ යතුරුපැදිකරු වූ නාවික සෙබළා අත්අඩංගුවට ගත් බව පල්ලෙවෙල පොලිසිය කියයි.

මෙසේ අත්අඩංගුවට ගෙන ඇත්තේ මීරිගම හිරිවලමුල්ල පදිංචිකරුවෙකි. පොලිස් සැරයන්වරයකු හා තවත් පොලිස් නිලධාරියකු හිරුවල ප්‍රදේශයේ වාහන පරීක්ෂා කිරීමේ යෙදී සිටියදී මීරිගම දෙසින් පැමිණි යතුරුපැදියක් නැවැත්වීමට සංඥා කර ඇතත් එම යතුරුපැදිකරු නොනවත්වා පලාගොස් තිබේ. 

එම නිලධාරීන් යතුරුපැදිකරු හඹාගොස් කොටකන්දට හැරෙන පාර අසලදී නවතාගෙන ඇතත් යතුරුපැදිකරු පොලිස් නිලධාරීන් අසලට පැමිණීම වළක්වමින් ආරක්ෂිත හිස්වැසුමෙන් පහර දෙමින් සිට තිබේ.

 මේ අතර මෙම යතුරුපැදිකරු නවතා තිබූ  පොලිස් යතුරුපැදියට පා පහරක් එල්ල කිරීමෙන් පසු එය පෙරැළී ගොස් ඇති බවද පොලිසිය කියයි. කලහකාරි ලෙස හැසිරුණු යතුරුපැදිකරු අත්අඩංගුවට ගැනීමට ආධාරක කණ්ඩායමක් ද මේ අතර පැමිණ තිබේ.

අල්ලා ගත් යතුරුපැදිකරු ඉතා අපහසුවෙන් පොලිසිය කරා ගෙන ගොස් ඇති අතර ඔහු බීමතින් සිටීදැයි පරීක්ෂාවකට ලක් කිරීමට පියවර ගත් බව පොලිසිය කියයි. මේ මෙහෙයුමට එක්වූ තවත් පොලිස් නිලධාරීන් දෙදෙනෙකු ද පහරදීමට ලක්ව ඇතැත් ඔවුන් තුවාල ලබා නැතැයි පොලිසිය කියයි.

නාවික සෙබළකු බව කියන මෙම යතුරුපැදිකරු මීට පෙර අවස්ථාවන්හී දී මේ ආකාරයෙන් බීමතින් යතුරුපැදි පදවා පලාගිය පුද්ගලයකු බව අනාවරණය වූ බව පොලිසිය කියයි.