(තිලකරත්න දිසනායක)
  
එච්අයිවී ආසාදිත තත්ත්වයේ පසුවන බව පැවසෙන මවකගේ දැරියට (9) දැනට ඉගෙනුම ලබන පාසලෙන් ලැබෙන අඩු සැලකිලි නිසා    වෙනත් පාසලක් ලබාදෙන ලෙස ඉල්ලා අද (26) දහවල් දැරිවියගේ  මව සහ ඥාති කාන්කාවක ගම්පහ කලාප අධ්‍යාපන කාර්යාලය ඉදිරිපිට උපවාසයක් ආරම්භ කළහ.
  
මෙම වසරේ පහ වසර ශිෂ්‍යත්වයට පෙනී සිටින බැවින් වෙනත් පාසලකට ඇතුළත් කර දෙන ලෙස ඉල්ලා ඔවුහු වෙස් මුහුණු පැළඳ කලාප කාර්යාලයෙහි දොරටුව අසල බිම වාඩි සිටියහ.
 
මෙම දැරියගේ මවට ඒඩ්ස් වැළඳ ඇති බව දැනට වසර එක  හමාරකට පමණ ඉහතදී රූපවාහිනී නාලිකාවක ප්‍රචාරය වීමත් සමඟ දැරියට ගැටලුකාරී තත්ත්වයකට මුහුණ දීමටසිදුවූවාය.  

ඒ අනුව ශ්‍රී ලංකා මානව හිමිකම් කොමිෂන් සභාවේ මැදිහත්වීමෙන් දැරියට පාසලට යෑමේ අවස්ථාව යලි සැලසිනි.  එහෙත් මේ වනවිට දැරියට පාසලට යා නොහැකි සේ අපහාසාත්මක අන්දමින් ඇනුම්පද පවසන බැවින් තම දරුවා පාසල් යාම ප්‍රතික්ෂේප කොට ඇතැයි දැරියගේ මව පැවසුවාය.
  
මේ සම්බන්ධයෙන් ගම්පහ කලාප අධ්‍යාපන අධ්‍යක්ෂිකා ඩබ්ලිව්.මල්ලිකා මහත්මියගෙන් කළ විමසීමේ දී ප්‍රකාශ කර සිටියේ අදාළ පාසලෙහි විදුහල්පතිවරයා කැඳවා මේ පිළිබද විමසු අතර මෙම සිසුවියගේ මව සහ ඇගේ ඥාතිවරිය පවසන අන්දමේ තත්ත්වයක් පාසලෙහි නොමැති බැවින් ගතයුතු ක්‍රියාමාර්ගය කුමක්ද යන්න සම්බන්ධයෙන් බස්නාහිර පළාත් අධ්‍යාපන අධ්‍යක්ෂවරයා වෙතින් අවශ්‍ය උපදෙස් ලබා ගැනීමට පියවර ගන්නා බවයි.

ශ්‍රී ලංකා මානව හිමිකම් කොමිෂන් සභාව මේ ගැටලුව ගැන සාකච්ඡා කිරීමට කලාප අධ්‍යාපන අධ්‍යක්ෂිකාව ඇතුළු නිලධාරීන් මීට ඉහත ගෙන්වූ අතර කලාප අධ්‍යාපන අධ්‍යක්ෂිකාවගෙන් ලැබෙන සහයෝගය අඩු බැවින් පසුගිය සතියේ පළාත් අධ්‍යාපන අධ්‍යක්ෂවරයා ගෙන්වීය. එහිදී දැරියට පාසල් යාමේ වාතාවරණයක් සකස් කර දෙන ලෙස පළාත් අධ්‍යාපන අධ්‍යක්ෂවරයාට කොමිසම දැනුම් දුන්නේය.