(දිලීප් ජයසේකර)
 
වසර පහකට පෙර සුරියවැව බෝගහඉදිවැවදි බාලවයස්කාර දැරියක අපයෝජනය කර ගැබිනියක කළැයි වරද පිළිගත් අයෙකුට වසර 15ක සිරදඬුවමක්, රුපියල් 2000ක දඩ මුදලක් හා වින්දිත දැරියට රුපියල් ලක්ෂ 10ක වන්දි මුදලක් ගෙවන ලෙස හම්බන්තොට මහාධිකරණ විනිසුරු ඒ.එන්.ජයකි ද අල්විස් මහත්මිය අද (24) නියෝග කළාය.
 
මෙලෙස සිර දඬුවම්, දඩ හා වන්දි නියම වූයේ සූරියවැව බෝගහඉදිවැව පදිංචි 31 හැවිරිදි එක් දරු පියෙකුටය.
 
සැකකරු 2015.11.01 හා 2016.01.07 අතර කාලය තුළදි සැකකරුගේ ඥාතිවරයෙකුගේ බාලවයස්කාර දියණියක බලහත්කාරයෙන් අපයෝජනය කර තිබූ බව අනාවරණය වී තිබේ. බාලවයස්කාර දැරිය රෝගී තත්වයකින් පසුවන්නියක් වන අතර ප්‍රතිකාර සඳහා ඇය කරාපිටිය රෝහලට ගිය අවස්ථාවේ වෛද්‍යවරුන් දැරිය ගැබ්ගෙන ඇති බව දන්වා තිබේ. ඒ අනුව දැරියගේ මව හා පියා සූරියවැව පොලිසියට පැමිණ සිද්ධිය සම්බන්ධයෙන් පැමිණිල්ලක් ඉදිරිපත් කර ඇත. දැරිය පොලිසියට කට උත්තරයක් දෙමින් පවසා ඇත්තේ ඒ අසළ පිහිටි ඥාති නිවසකට මිදුල අතුගෑම සඳහා ඉදලක් ඉල්ලා ගැනීමට ගිය අවස්ථාවේ සැකකරු ඇයව අපයෝජනය කළ බවයි.
 
දැරියගේ ප්‍රකාශ අනුව සිද්ධියට සම්බන්ධ බව කියන සැකකරු සොයා පොලිස් පරීක්ෂණ ආරම්භ කෙරුණු අතර එහිදී සැකකරු නීතීඥයෙකු මාර්ගයෙන් සුරියවැව පොලිසියට බාර වී තිබේ. පසුව පොලිසිය විසින් සැකකරුගෙන් ප්‍රකාශ සටහන් කරගැනීමෙන් පසු හම්බන්තොට මහේස්ත්‍රාත් අධිකරණයට ඉදිරිපත් කළේය. එහිදී පැවති මුලික නඩු විභාගයෙන් පසු නීතිපතිවරයා විසින් සැකකරුට එරෙහිව 2019.08.08 දින හම්බන්තොට මහාධිකරණය හමුවේ අධිචෝදනා ගොනු කෙරුණි. ඒ අනුව පැවති නඩු විභාගයේදී සැකකරු අධිකරණය ඉදිරියේ සිය වරද පිළිගත්තේය.
 
චෝදනාව සඳහා වැරදිකරු වු චුදිතයාට වසර 15 ක සිර දඬුවමක් නියම කළ මහාධිකරණ විනිසුරුවරිය විසින් එය වසර 20ක කාලයක් සඳහා අත්හිටවන ලදි. මීට අමතරව රුපියල් 2000ක දඩ මුදලක්ද නියම කළ අතර එය නොගෙවන්නේ නම් ඇය වසරක බර වැඩ සහිත සිරදඬුවමක්ද නියම කළාය. මීට අමතරව වින්දිත දැරිය හා ඇයගේ දරුවා සඳහා රුපියල් ලක්ෂ 10ක වන්දි මුදලක් ගෙවන ලෙසද මහාධිකරණ විනිසුරුවරිය නියෝග කළ අතර එය නොගෙවන්නේ නම් තවත් වසර 05ක බරවැඩ සහිත සිර දඩුවමක්ද නියම කළාය. චූදිත තැනැත්තා ලබා දුන් වන්දි මුදලින් රුපියල් ලක්ෂ 7ක මුදලක් වින්දිත දැරියගේ දරුවාගේ නමින් ගිණුමක තැන්පත් කරන ලෙස නියෝග කළාය. 

චූදිතයා හේතුවෙන් වින්දිත දැරියට උපන්, අන්ධ භාවයෙන් පෙළෙන කුඩා දරුවාට වයස අවුරුදු 18ක් වන තෙක් මාසයකට රුපියල් 5000 බැගින් මාසික දිමනාවක් ගෙවන ලෙසද මහාධිකරණ විනිසුරුවරිය චුදිතට නියම කළාය. චුදිත තැනැත්තා ලක්ෂ 10ක වන්දි මුදලින් අද(24) අධිකරණයේදී වින්දිත දැරියට රුපියල් ලක්ෂ 8ක මුදලක් ගෙවූ අතර ඉතිරි ලක්ෂ 2ක මුදල නොවැම්බර් 24 දින ගෙවන ලෙස නියෝග කළාය. නීතිපතිවරයා  වෙනුවෙන් රජයේ අධිනීතීඥ ගෙවිදු සෙනෙවිරත්න මහතා පෙනී සියේය.