(ශාන්ත ප්‍රදීප් කුමාර කුලරත්න)

කිසියම් අයකුට අනතුරක් වේ යැයි සිතා මහමග වැටී තිබූ විදුලි රැහැනක් ඉවත් කිරීමට ගිය පුද්ගලයකු විදුලි සැර වැදීමෙන්  ජීවිතක්ෂයට පත්ව ඇතැයි මිරිහාන පොලීසිය පවසයි.

මියගොස් ඇත්තේ දැරණියගල, දෙල්ඔළුව, වල්පොල,  පදිංචි හිටිගෙදර මුදියන්සේලාගේ උපාලි රංජිත්  (42) හැවිරිදි  විවාහකයෙකි.

මෙම පුද්ගලයා අංගොඩ ප්‍රදේශයේ ගොඩනැගිලි ද්‍රව්‍ය  අලෙවි මධ්‍යස්ථානයක සිට මිරිහාන ප්‍රදේශයේ නිවසකට ටිපර් රථයකින් භාණ්ඩ  තොගයක් ප්‍රවාහනය කරමින් සිටියදී, බැද්දගාන හන්දිය ආසන්නයේ  මාර්ගය හරහා විදුලි රැහැනක් වැටී තිබී ඇත. ඉන් පදිකයින්ට අනතුරක් වේයැයි සිතා එය ඉවත් කිරීමට යාමත් සමඟ විසන්ධි නොවී තිබූ විදුලි සැර වැදී අනතුර සිදුව ඇති බව පොලීසිය කියයි.

ඉන් අනතුරට පත් පුද්ගලයා  මහමග වැටී සිටියදී  මාර්ගයේ ගමන් ගත් වෙනත් පුද්ගලයකු ප්‍රතිකාර සඳහා කළුබෝවිල ශික්ෂණ රෝහල වෙත රැගෙන ගොස් බාරදී ඇති අතර එහි  හදිසි අනතුරු ඒකකයේ ප්‍රතිකාර ලබමින් සිටියදී මියගොස් ඇති බව පැවසෙයි.

මියගිය පුද්ගලයා සන්තකයේ තිබූ දුරකතන අංකයකට දන්වා ඥාතීන් කැඳවා දේහය හඳුනාගැනීමෙන් අනතුරුව කළුබෝවිල හදිසි මරණ පරීක්ෂක සාම විනිසුරු විපුල නරසිංහ  මහතා විසින්  දේහය පිළිබඳ පශ්චාත් මරණ පරීක්ෂණය කළුබෝවිල ශික්ෂණ රෝහලේ හදිසි මරණ පරීක්ෂණ අධිකරණයේදී සිදුකෙරිණි.

එහිදී මෘත  දේහය පිළිබඳ පශ්චාත් මරණ පරීක්ෂණ වෛද්‍ය වාර්තාව කළුබෝවිල ශික්ෂණ රෝහලේ අධිකරණ වෛද්‍ය නිලධාරී වෛද්‍ය ජේ.පී. අබේසිංහ මහතා විසින් නිකුත් කර තිබුණි.

ඉදිරිපත් වූ වෛද්‍ය වාර්තාව හා සාක්ෂි සැලකිල්ලට ගනිමින් මියගිය පුද්ගලයාගේ මරණයට හේතුව නොදක්වා විවෘත තීන්දුවක් ලබාදෙමින් අනතුර සිදුවූ  බල ප්‍රදේශය අයත්  ලංකා විදුලිබල මණ්ඩලයේ ඉංජිනේරුවරයාගේ වාර්තාවක් 2021/02/06 කැඳවන ලෙසට හදිසි මරණ පරීක්ෂක සාමවිනිසුරු විපුල නරසිංහ මහතා පොලීසියට නියෝග කළේය .