(මහින්ද නිශ්ශංක)
ගුවන් තොටුපොල හා ගුවන් සේවා සමාගම සහ ප්‍රවාහන අමාත්‍යංශය එක්ව ආරම්භ කරන ලද සුඛෝපභෝගී බස් සේවාව වහා අත්හිටුවන ලෙස ලංකා පෞද්ගලික බස් හිමියන්ගේ සංගමයේ ගම්පහ දිස්ත්‍රික් සංගමය අද (16) මැතිවරණ කොමිෂන් සභාවට පැමිණිලි කරමින් ඉල්ලීමක් කළේය.
මැතිවරණයක් ප්‍රකාශයට පත්කර තිබෙන අවස්ථාවක මෙම සුඛෝපභෝගී බස් සේවාව ආරම්භ කිරීම මැතිවරණ නීති උල්ලංගනය කිරීමක් මෙන්ම නීති විරෝධී යයිද එම සංගමයේ සභාපති ලැම්බට් මධුරගේ මහතා පැවසීය.
ජාතික ගමනාගමන කොමිෂන් සභාවේ සහ බස්නාහිර පළාත් මාර්ගස්ථ මගී ප්‍රවාහන අධිකාරියේ අවසරයකින් තොරව මෙම සුඛෝපභෝගී බස් සේවාව ආරම්භ කර ඇතැයි ඔහු සඳහන් කළහ.
මේ අතර නව සුඛෝපභෝගී බස් සේවාව ආරම්භ කිරීමට විරෝධය දක්වා ඊයේ ආරම්භ කළ මාර්ග අංක 187 ගුවන් තොටුපොල - කොටුව සුඛෝපභෝගී පෞද්ගලික බස් රථ වර්ජනය අද දෙවන දිනටත් ක්‍රියාත්මක කෙරෙන බව ද ඔහු වැඩි දුරටත් පැවසූහ.
