(යොහාන් භාසුර)
විදේශ ගමන් බලපත්‍රය ගැනීම සඳහා දිනයක් සහ වේලාවක් වෙන්කරගැනීමේ මාර්ගගත ක්‍රමය නැවත ආරම්භ කර අනිද්දා (6) සිට ක්‍රියාත්මක වන බවත් එම ක්‍රමය තුළින් ලබන දෙසැම්බර් මස මුල දින සිට ලබාගත හැකි බවත් වැඩබලන ආගමන විගමන පාලක නිලූෂා බාලසූරිය මහත්මිය අද (4) පැවසුවාය.
ආගමන විගමන දෙපාර්තමේන්තුවේ වෙබ් අඩවියේ වම් පස ඇති දිනයක් වෙන්කිරීමේ සබැදියාවට පිවිස එහි පද්ධතියට ඇතුළු වී ජාතික හැදුනුම්පත් අංකය යොදා දිනයක් සහ වේලාවක් වෙන්කරගත හැකි බව ද බාලසූරිය මහත්මිය සඳහන් කළාය.
විදේශ ගමන් බලපත්‍රය හදිසි පුද්ගලයෙක් වුවද මෙම ක්‍රමයට දිනයක් සහ වේලාවක් වෙන්කරගෙන බත්තරමුල්ලට පැමිණ අදාල ලියවිලි ඉදිරිපත් කළ යුතු බවත් විදෙශ ගමන් බලපත්‍රය හදිසි පුද්ගලයන්ගේ ප්‍රමුඛතාව පරීක්‍ෂා කිරීම සඳහා කමිටුවක් පත්කර ඇති බවත් ඇය කීවාය.
මෙම මාසයට අදාල ඉදිරි දින මේ වන විටත් ජනතාවට දී ඇති බව කී නිලූෂා බාලසූරිය මහත්මිය විදේශ ගමන් බලපත්‍ර ගැනීමට ඇති දිගු පෝලිම නැති කිරීමට මෙම ක්‍රමය නැවත හදුන්වාදුන් බව ද සඳහන් කළාය.
මෙම ක්‍රමයට යටතේ බත්තරමුල්ල ප්‍රධාන කාර්යාලය සහ සෙසු ප්‍රාදේශීය කාර්යාලවලින් දිනකට එක්දින සේවයෙන් විදේශ ගමන් බලපත්‍ර 1,200 ක් නිකුත් කරන බව කී ඇය 1919 (රාජ්‍ය තොරතුරු කේන්ද්‍රය) සහ 1962 (ආගමන විගමන දෙපාර්තමේන්තු) යන ක්‍ෂණික දුරකථනවලට ඇමතීමෙන් වැඩිදුර තොරතුරු විමසිය හැකි බව ද පැවසුවාය.
ආගමන විගමන දෙපාර්තමේන්තුව සතුව මේ වන විට හිස් විදේශ ගමන් බලපත්‍ර පොත් 33,000 ක් පමණ ඇති බවත් තවත් පොත් 750,000 ක් මේ මස අග වන විට ලැබීමට නියමිත බවත් ඇය කීවාය.
ආගමන විගමන දෙපාර්තමේන්තුව තුළ පසුගිය කාලයේ සිදුවූ කටයුතු පිළිබඳව වෝහාරික විගණනයක් මේ වන විට ක්‍රියාත්මක වන බවත් එහි ප්‍රතිඵලය අනුව ආගමන විගනම දෙපාර්තමේන්තුව වර්තමානයේ ඇඳවැටී ඇති තත්වයට වගකිවයුත්තන් හදුනාගත හැකි බවත් වැඩබලන ආගමන විගමන පාලක නිලූෂා බාලසූරිය මහත්මිය වැඩි දුරටත් පැවසුවාය.
නිලූෂා බාලසූරිය මහත්මිය මෙහිදී ඇතැම් කරුණු ප්‍රකාශ කිරීමට නොහැකි යැයි පැවසීමත් සමඟ ඇයට මාධ්‍යවේදීන්ගෙන් විරෝධය එල්ල වූහ. මාධ්‍යවේදීන්ගේ දැඩි විරෝධය හමුවේ පිළිතුරු නොමැතිව සිටි ඇය අසම්පූර්ණ කරුණු මාධ්‍ය වෙත පැවසුවාය.
ඇය ඉන් පසුව එම මාධ්‍ය හමුව විදේශ ගමන් බලපත්‍ර ගැනීමට දිනයක් සහ වේලාවක් වෙන්කිරීම සම්න්ධයෙන් පමණක් දැනුවත් කිරීමට සංවිධානය කළ එක්ක යැයි පවසමින් මාධ්‍ය හමුව අවසන් කළාය.
(ඡායාරූපය: ජයමාල් චන්ද්‍රසිරි)
