(රුමේෂ් එම් වීරසේකර)
පොළොන්නරුව ,දියබෙදුම පොලිසියේ සිව්දෙනෙකු සිවිල් ඇඳුමින් සැරසී යතුරුපැදි දෙකකින්,තමාගේ ජංගම දුරකථනය උදුරා ගනිමින්,යතුරුපැදියට නංවාගෙන ගොස් පොලු වලින් පහරදුන් බව, ආර් 57, දිග්ගල්පිටිය ලිපිනයේ පදිංචි 31 වියැති දෙදරුපියකු වන ඩබිලිව්.ජී. මහේෂ් රණරාජා විජේසූරිය මහතා පැවසීය.
වෘත්තියෙන් පෙදරේරුවකු වූ ඔහු පැවසුවේ තමා නීති විරෝධී අරක්කු විකුණන බවට චෝදනා කරමින් සිවිල් ඇඳුමින් සැරැසුණ පොලීසියේ සිව්දෙනා තමා රැගෙන ගොස් දිග්ගල්පිටිය ප්‍රදේශයේ, බැංකුවක් අසලදී පොලු හා අතින් පයින් පහරදී දියබෙදුම පොලිසියට රැගෙන ගිය බවයි.
තමාට දිග්ගල්පිටිය ප්‍රදේශයේ මූල්‍යය බැංකුවක් අසලදී පහරදෙන ආකාරය ආරක්ෂිත කැමරාවල හොඳින් සටහන් වී තිබෙන බවත්, තමා මේ පිළිබඳ පොලිසියට වෙනම පැමිණිල්ලක් නොකළේ පොලිසිය පිළිබඳ කිසිදු විශ්වාසයක් නොමති නිසා බවත් ඔහු කීවෙිය.
එමෙන්ම මේ පිළිබඳ ආරක්ෂක ඇමතිවරයා ඇතුළු පොලිස්පතිවරයාගේ අවධානය යොමු කරන ලෙසද තමා ඉල්ලා සිටින බව රණරාජා විජේසූරිය මහතා කීවේය.
අප මේ පිළිබඳව දියබෙදුම පොලිස් ස්ථානාධිපති පොලිස් පරීක්ෂක කේ.එම්.සී. මධුසංක මහතාගෙන් දුරකථනයෙන් කළ විමසීමකදී ඔහු පැවසුවේ මේ පිළිබඳ පුළුල් පරීක්ෂණයක් ආරම්භ කර තිබෙන බවත්, පහරදුන් සිව්දෙනාට විරුද්ධව ඉදිරී පියවර ගැනීමට කටයුතු කරන බවයි.
