(විමුක්ති එස් රුද්‍රිගු)
බංග්ලාදේශ හිටපු අග්‍රාමාත්‍ය ෂෙයික් හසීනාට එරෙහිව නඩු පිට නඩු වැටෙමින් පවතින බව එරට මාධ්‍ය වාර්තා කළේය. හසීනාට සහ අවාමි ලීගයේ අමාත්‍යවරුන් කීපදෙනෙකුට එරෙහිව විවිධ පාර්ශ්ව විසින් නඩුකර කීපයක් ගොනුකරනු ලැබ ඇතැයි බංග්ලාදේශ මාධ්‍ය සඳහන් කළේය.
හසීනාට එරෙහිව එල්ලවී ඇති මනුෂ්‍යත්වයට එරෙහි අපරාධ සහ ජන සංහාර චෝදනා සම්බන්ධයෙන් විමර්ශනයක් සිදු කරන ලෙස ඉල්ලමින් ජාත්‍යන්තර අපරාධ අධිකරණයේ පෙත්සමක්ද ශ්‍රේෂ්ඨාධිකරණයේ නීතිඥවරයකු 2015 වසරේදී බලහත්කාරයෙන් අතුරුදන් කිරීමේ චෝදනාව යටතේ හසීනාට සහ තවත් පුද්ගලයන් සිවු දෙනෙකුට එරෙහිව ඩකා මෙට්‍රොපොලිටන් මහේස්ත්‍රාත් අධිකරණයේ නඩුවක්ද ගොනු කරනු ලැබ ඇත.
එසේම ෆයිසුල් ඉස්ලාම් රාජොන් නම් 18 හැවිරිදි විශ්ව විද්‍යාල ශිෂ්‍යයෙකු විරෝධතා අතරතුර ඩකා නගරයේදී වෙඩි තබා ඝාතනය කිරීම සම්බන්ධයෙන් හසීනාට සහ තවත් පුද්ගලයන් 24 දෙනකුට එරෙහිව ඩකා මෙට්‍රොපොලිටන් මහේස්ත්‍රාත් අධිකරණයේ තවත් නඩුවක්ගො නු කෙරිණි.
මොහොම්මද්පූර් ප්‍රදේශයේ වෙළඳසැල් හිමියකු පොලිස් වෙඩි පහරින් ඝාතනයට ලක්වීමේ සිදුවීමට අදාලව හසීනාට සහ තවත් පුද්ගලයන් සය දෙනෙකුට එරෙහිව මනුෂ්‍ය ඝාතන චෝදනා යටතේ පසුගියදා ගොනු කරන ලද නඩුවේ අවසන් විමර්ශන වාර්තාව එළඹෙන සැප්තැම්බර් මස 25 වැනිදා ප්‍රථම අධිකරණය ඉදිරිපත් කරන ලෙසද ඩකා මෙට්‍රොපොලිටන් මහේස්ත්‍රාත් අධිකරණයේ නියෝග කළේය.
ජාත්‍යන්තර අපරාධ අධිකරණයේ ගොනු කරනු ලැබූ පෙත්සමේ වග උත්තරකරුවන් ලෙස හසීනා, අවාමි ලීගයේ මහා ලේකම් ඔබයිදුල් ක්වේඩර්, හිටපු අමාත්‍ය අසදුස්සාමන් ඛාන් සහ තවත් අවාමි ලීගයේ ඉහළ පෙළේ සාමාජිකයන් කීපදෙනකු නම් කර තිබේ. එසේම අවාමි ලීගය සහ අවාමි ලීගයට සම්බන්ධ සංවිධානද මෙම පෙත්සමේ වග උත්තරකරුවන් කර ඇත.
රජයේ රැකියා කෝටාව සම්බන්ධයෙන් පැවැති විරෝධතා අතරතුර මියගිය ශිෂ්‍යයකු වූ අරීෆ් අහමඩ් ෂියාම්ගේ පියවූ බුල්බුල් කබීර් විසින් මෙම පෙත්සම ගොනු කරනු ලැබ තිබිණි. හසීනා සහ අවාමි ලීගය රජය ශිෂ්‍ය විරෝධතා ප්‍රචණ්ඩකාරී ලෙස මර්දනය කළ බවත් ඒ හේතුවෙන් විරෝධතාවලදී මරණයට පත්වූ සංඛ්‍යාව ඉහළ ගිය බවත් ඉන් මානව හිමිකම් උල්ලංඝනය වූ බවත් පවසමින් කබීර් සිය පෙත්සම ගොනු කරනු ලැබුවේය.
ශිෂ්‍ය විරෝධතා අතරතුර මාධ්‍ය හමුවක් පවත්වමින් හසීනා ජනතාව කුපිත කරවන ආකාරයේ ප්‍රකාශයක් කළ බවත් එය සිසුන්ට එරෙහිව ප්‍රචණ්ඩත්වයට හේතුවූ බවත් පෙත්සම්කරු සිය පෙත්සමේ සඳහන් කර ඇත. එසේම විරෝධතාවල නියැලි සිසුන් 450,000 කට එරෙහිව අපරාධ නඩු 286 කට අදාළව වැරදි සහගත ලෙස චෝදනා ගොනු කර ඇතැයිද එම පෙත්සමේ සඳහන් වේ.
