ඉඩම් ආරවුලක් අඟල් දෙකක ඉඩම් කොටසක් ලබාදී දෙපිරිස සතුටුකර ආරවුල විසඳීමට ඊයේ (31) දඹුල්ල මූලස්ථාන පොලිස් පරීක්‍ෂක එන්.ජේ.වීරසිංහ මහතාට හැකිවිණි. දඹුල්ල දඹුලූ ඔය සක්විති උයන ප‍්‍රදේශයේ පදිංචි කරුවන් දෙදෙනකු අතර කාලයක සිට මෙම ඉඩම් ආරවුල පැවතී ඇත. එක් පාර්ශවයක් චෝදනා කැර සිටින්නේ තම ඉඩමෙන් අඟල් හතරක කොටසක් අල්ලා වැට ගසා ඇති බවයි. විරුද්ධ පාර්ශවය කියා සිටින්නේ එවැන්නක් සිදු නොකළ බවත් තම ඉඩමෙන් අඟලක් හෝ ලබා නොදෙන බවය. මෙම හබය විසඳීමට කාලයක සිට පොලිසිය උත්සාහ ගත්තද අසාර්ථක වී ඇත. ඊයේ (31) දඹුල්ල මුලස්ථාන පොලිස් පරීක්ෂක එන්.ජේ.වීරසිංහ මහතා දෙපාර්ශවයම ගෙන්වා දැඩිලෙස අවවාද කළේය. බිම් අඟලකට වසර ගණනාවක් විරසකව සිටීම ගැනත් පහදා දුන්නේය. එක් පාර්ශවයක් ඉවත් වී සිටින්නැයි කළ ඉල්ලීම් ඔවුන් ඉවත දැමීය. පසුව පොලිස් පරීක්‍ෂක වරයා අපූරු යෝජනාවක්  ගෙනාවේය. ඒ අඟල් හතරක් වැඩියෙන් අල්ලා වැට ගසා ඇති ඉඩමෙන් අඟල් දෙක බැගින් වෙන් කොට දෙපාර්ශවයට බෙදා ගැනීමටයි. එම යෝජනාවට දෙපාර්ශවය කැමැත්ත පළ කළේය. ඒ අනුව පොලිස් නිලධාරීන් ගේද සහය ඇතිව අසාධාරණයක් නොවන පරිදි පර්චස් 15 වේ වූ ඉඩම් කොටස් දෙකකට අඟල් දෙක බැගින් ලබාදී වෙන් කැර වැට ගැසීමට ඔවුන්ට හැකිවිණි. කාලයක් තිස්සේ අඟල් හතරක ඉඩම් කොටසට විරසකවී සිටි දෙපාර්ශවය සුහදව මෙම විසඳුම අනුව සිටින බව පොලිසිය ඉදිරියේ පවසා ඇත.